Planet alimləri Merkurinin şimal qütbünün yaxınlığında duzlu buzlaqlar aşkar ediblər. Bu kəşf onlara Günəşə ən yaxın planetdə həyatın mümkün olduğunu söyləməyə imkan verib.

Valyuta.az xəbər verir ki, asteroidlərin təsirindən əmələ gələn Merkurinin Raditladi və Eminesku kraterlərində tapılan bu buzlaqlar adətən Yerdə görünən buzlaqlara bənzəmir. Bunlar Merkurinin səthinin dərinliklərində uçucu birləşmələri tutan faktiki duz axınlarıdır.

Planet Elmləri İnstitutunun həmmüəllifi planetoloq Brayan Travisin fikrincə, bu duz axınları uçucu maddələri "bir milyard ildən çox müddətə" saxlaya bilər. Bu cür uçucu birləşmələr, geoloqların anlayışına görə, su, karbon qazı və azot ola bilər, - Live Science yazır.

Merkuridəki duz yataqları tipik aysberqlər və ya Arktika buzlaqları kimi olmasa da, Yer kürəsində oxşar duzlu mühitlər mövcuddur. Beləliklə, elm adamları belə bir mühitin necə fəaliyyət göstərdiyi və orada həyatın yarana biləcəyi barədə bir təsəvvürə sahibdirlər. Onların fikrincə, temperaturun -170°C ilə +350°C arasında dəyişdiyi planetdə həyatın mövcud ola biləcəyinə hələ də ümid var.

“Yer üzündəki xüsusi duz birləşmələri, hətta baş verdikləri ən sərt mühitlərdə belə həyat üçün uyğun yuvalar yaradır. Məsələn, Çilidəki quraq Atakama səhrasında. Bu düşüncə xətti bizi Merkuridə onun sərt səthindən daha qonaqpərvər ola biləcək yeraltı sahələrin mümkünlüyünü nəzərdən keçirməyə sövq edir”, - tədqiqatın aparıcı müəllifi, Planet Elmləri İnstitutunun planetoloqu Aleksis Rodriges bildirib.
Rodriguez qeyd edir ki, bu kəşf Plutonun azotlu buzlaqlara malik olduğunu göstərən digər son araşdırmaları tamamlayır. Onlar birlikdə sübut etdilər ki, buzlaşma bir çox yerdə müşahidə oluna bilər - Günəş sisteminin ən isti sərhədlərindən tutmuş ən soyuq sərhədlərinə qədər.

Planet alimləri hesab edirlər ki, uçucu maddələrin olması Merkurinin tarixinin əvvəlində isti atmosferə malik olduğuna dəlil ola, yaxud Merkuridə göllərin mövcudluğunu sübut etmək və ya gənc Merkurinin vulkanik dərinliklərində sıx duzlu buxarın olması haqqında danışmağa imkan verə bilər.

Nicat