Yeni planet elm adamları arasında maraq doğurur, çünki o, planetlərin əmələ gəlməsi ilə bağlı mövcud nəzəriyyələrə ziddir.

Valyuta.az xəbər verir ki, Gliese 367 b və ya Tahay adlı planet ultraqısa dövr planetləri (USP) kateqoriyasına aiddir. O, öz ulduzunun ətrafında cəmi 7,7 saata dövr edir. 5000-dən çox ekzoplanetin kataloqunda artıq 200-ə yaxın USP planeti qeydə alınsa da, Tahay onlardan ultra yüksək sıxlığı ilə seçilir - o, Yerdən təxminən iki dəfə sıxdır.

Bu, planetin çox güman ki, ilk növbədə dəmirdən ibarət olduğunu göstərir. Tədqiqatçılar Tahayı 2021-ci ildə TESS (Transiting Exoplanet Survey Satellite) peyki tərəfindən toplanan məlumatlarda aşkar ediblər. Bununla belə, yeni tədqiqat onun kütləsi və radiusunun daha dəqiq ölçülməsini təmin edir, həmçinin onun yaxınlığında daha iki planetin olduğunu aşkar edir.

Tədqiqat Türin Universitetindən PhD Elisa Goffo tərəfindən aparılıb.

Tahay TESS tərəfindən Gliese 367 kimi tanınan qırmızı cırtdan ulduzun son dərəcə zəif tranzit siqnalı sayəsində kəşf edilib. Siqnal o qədər zəif olub ki, TESS peykinin aşkarlama imkanlarından bir qədər kənara çıxıb, ona görə də astronomlar onu yayan planetin Yerdən böyük olmadığını biliblər.

Tədqiqatçılar GJ 367 b-nin kütləsini və sıxlığını müəyyən etmək üçün Avropa Cənub Rəsədxanasının Yüksək Dəqiqlikli Radial Sürət Planet Axtarışı (HARPS) spektroqrafından istifadə ediblər. Tədqiqatın nəticələri göstərib ki, planetin radiusu Yerin 72%-ni, kütləsi isə 55%-ni təşkil edir. Bu məlumatlar göstərir ki, Tahay çox güman, dəmir planetdir və əvvəllər mövcud olan daha böyük planetin qalığıdır.

Alpər