ABŞ Federal Ehtiyat Sistemi ("Fed") ilin ilk faiz qərarını elan edib. 

Valyuta.Az xəbər verir ki, iki gün davam edən iclasın nəticəsi olaraq, bank gözləntilərə uyğun olaraq siyasət faizini dəyişməyib və 4,25-4,50% aralığında saxlayıb. Qərar yekdilliklə qəbul edilib.

"Fed"in açıqladığı bəyanatdan inflyasiyanın hədəfə doğru irəlilədiyini bildirən ifadə çıxarılıb. Pul siyasəti mətnində inflyasiyanın "nisbətən yüksək" olduğu və iqtisadi perspektivlərin qeyri-müəyyən qaldığı vurğulanıb. Həmçinin, əmək bazarının güclü qalmağa davam etdiyi qeyd edilib.

Bazarda "Fed"in ABŞ Prezidenti Donald Trampın (Donald Trump) siyasətlərinin iqtisadi təsirlərinə dair daha çox aydınlıq yaranana qədər hər hansı addım atmayacağı gözləntisi mövcuddur.

Tramp ötən həftə Davosdakı çıxışında, "Faiz dərəcələrinin dərhal endirilməsini tələb edəcəyəm. Eyni zamanda, bütün dünyada faizlər düşməlidir. Faiz dərəcələri hər yerdə bizi izləməlidir" – ifadələrini işlətmişdi.

Digər tərəfdən, Trampın Meksika və Kanadadan idxal olunan mallara 25%-lik gömrük rüsumu tətbiq edəcəyi ilə bağlı təhdidi inflyasiyanın daha da artacağı narahatlığını gücləndirir.

"Fed" sentyabr ayından bəri ardıcıl üç iclasda ümumilikdə 100 baza bəndi faiz endirimi həyata keçirib. Sentyabrda 2025-ci il üçün dörd faiz endirimi proqnozlaşdıran "Fed" rəsmiləri bu gözləntini iki endirimə qədər azaldıblar.

Dekabr iclasına aid protokollarda "Fed" rəsmiləri artan inflyasiya risklərinə görə yeni mövqe tutaraq gələcək aylarda daha ehtiyatlı addımlar atmaq qərarına gəliblər. Demək olar ki, bütün iştirakçılar inflyasiya risklərinin artdığına diqqət çəkib.