"Bitkoin" 100.000 dollar tarixi səviyyəsinə doğru yüksəlişini tamamlamadan sabitləşib. 

Valyuta.Az xəbər verir ki, cümə günü altı rəqəmli dönüş nöqtəsinə 300 dollar qalmış "Bitkoin", bazar günü 95.776 dollara qədər ucuzlaşıb. Bazar ertəsi isə 98.065 dollar səviyyəsinə qalxıb. Trampın Xəzinədarlıq naziri vəzifəsinə hedc fond meneceri Skott Bessenti seçməsi qlobal bazarlarda müsbət əhval-ruhiyyəni artırıb.

"Miller Tabak + Co" şirkətinin baş bazar strateqi Matt Maley bildirib ki, investorlar "Bitkoin"in "əslində 100.000 dollar səviyyəsini sınaqdan keçirdiyi üçün bir qədər fasilə verməsindən" narahatdırlar. O, əlavə edib ki, "Bitkoin ətrafındakı yüksəliş həddini aşa bilər."

⇒ Trampın vədləri

Tramp daha dost tənzimləmələr və milli "Bitcoin" ehtiyatının yaradılacağını vəd edib. Lakin bu ehtiyatın formalaşdırılması üçün vaxt cədvəli və həyata keçirmə imkanları hələ də qeyri-müəyyən olaraq qalır.

"FalconX" kripto broker şirkətinin araşdırma rəhbəri Devid Lawant deyib ki, "100.000 dollar səviyyəsinə yaxınlaşarkən satış istiqamətində artan meyil görürəm." O əlavə edib ki, "Bu, yaxın müddətdə bu səviyyənin üzərində davamlı irəliləyiş olmadan əvvəl konsolidasiyanın baş verəcəyini göstərə bilər."

İnvestorlar ABŞ-da kriptovalyutaların perspektivini dəyərləndirərək "Bitkoin"i 100.000 dollar həddinə çatdırıblar. Bu simvolik səviyyə, rəqəmsal aktivlərdə dəyər görməyən skeptiklərin rəylərinə cavab olaraq kriptovalyuta tərəfdarları üçün mühüm nailiyyət hesab edilir.

⇒ "Cantor" müzakirələri

"Bloomberg"in məlumatına görə, "Cantor Fitzgerald LP" şirkəti "Tether Holdings Ltd." ilə sabit kriptovalyuta dəstəyi üzrə danışıqlar aparır. Bu dəstək "Cantor"un müştəriləri üçün planlaşdırılan kredit proqramında "Bitkoin"i təminat olaraq göstərməyə imkan verəcək.

"Cantor"un icraçı direktoru Hovard Lutnik, Trampın keçid komandasının həmsədri və gələcək Ticarət naziri kimi nəzərdə tutulan şəxsdir. Keçid komandası həmçinin Ağ Evdə rəqəmsal aktiv siyasətinə həsr olunmuş ilk vəzifənin yaradılıb-yaradılmayacağını müzakirə edir.

ABŞ-da birbaşa "Bitkoin"ə investisiya edən fondlara axın artır və bu məhsulların aktivləri hazırda 107 milyard dollar dəyərindədir.

"FRNT Financial Inc." kripto investisiya şirkətinin baş direktoru Stefan Ouellette qeyd edib: "Bitkoin seçkidən bəri həddindən artıq alınıb, bir dayanma qaçılmaz idi. Bununla belə, bu, geri çəkilmə deyil, yalnız keçən həftənin ortasındakı səviyyələrə qayıtdıq."

Rəhim