Son bir neçə ildir daşınmaz əmlak bazarında qiymət artımı müşahidə olunur. Bu qiymət artımına isə müxtəlif amillər təsir edir. Paytaxt Bakı ilə yanaşı ölkənin digər iri şəhərlərində də daşınmaz əmlak bazarında bahalaşma var. Bəs 2025-ci ildə bu bazarı nə gözləyir? Daşınmaz əmlak bazarında qiymətlər necə dəyişəcək?

Mövzu ilə bağlı Valyuta.az-a danışan əmlak məsələləri üzrə ekspert Elnur Fərzəliyev bildirib ki, 2025-ci ildə mənzil bazarında qiymətlərdə 20-25 faiz artım müşahidə olunacaq.

Ekspert əlavə edib ki, ipoteka ilə satılan mənzillərdə qiymət artımları daha ciddi şəkildə ola bilər:

“Son 3 ildə satılan daşınmaz əmlakların 70 faizə qədər hissəsi müxtəlif növ kredit şərtləri- ipoteka və daxili kreditlərlə satılan əmlaklardır. Hər hansısa bir əmlak ipoteka krediti ilə satılırsa, bu əmlakların kredit müddəti bitməyənə qədər onlar satışa çıxarıla bilmir. Son illər kreditlə, xüsusi ilə ipoteka krediti ilə satılan əmlakların yenidən əmlak bazarına daxil olub, satışa çıxmasına artıq uzun - 5, 10, 20 il vaxt tələb olunur. Bu da onu deməyə əsas verir ki, ipotekalara tələbat artdıqca, ipoteka predmetinə çevrilə bilən əmlakların satış qiymətlərində ciddi artımlar olacaq. Çünki tələbat çox, amma əmlak sayı azdır”.

2025-ci ildə əmlak bazarı ilə bağlı gözləntilərdən danışan Elnur Fərzəliyev bildirib ki, bu il çıxarışsız fərdi həyət evlərinə çıxarışların verilməsi gözlənilir:

“Əgər həmin evlərə çıxarış verilərsə, bu əmlak bazarına 10 minlərlə ucuz çıxarışı olan evlərin daxil olması deməkdir. Bu qədər də əmlak bazara daxil olarsa, rəqabət yarada, qiymətlərin stabilləşməsinə gətirib çıxara bilər. Başqa bir tərəfdən isə artıq belə bir hal baş verərsə, xüsusən də ölkənin böyük şəhərlərində aztəminatlı insanların ev problemləri aradan qalxmış olar. Hazırkı vəziyyətdə çıxarışı olmayan ucuz fərdi həyət evlərinin qiymətləri 20 min-70 min arası dəyişir. Həmin evlərə də çıxarışlar verildiyi zaman, onlar ipoteka predmetinə çevriləcək. Bu zaman isə həmin mənzillərin ilkin ödənişi, aylıq ödənişi az olacaq və hər kəs üçün əlçatan ola biləcək. Bu baxımdan da gözlənti və ümidlər həmin evlərə sənədlərin verilməsidir ki, bu hal baş versə, qiymətlərdə stabilləşmənin olması, hətta ucuzlaşmanın olması qaçılmılmazdır. Bundan başqa 2025-ci ildə də məcburi köçkünlərin böyük bir hissəsi yenidən işğaldan azad olunmuş ərazilərdə tikilən evlərə köçürüləcək. Onların da böyük bir qismi də yenidən öz yurd-yuvalarına geri dönərlərsə, bu artıq həmin ərazilərə tələbatın artmasına, paytaxt Bakıda isə tələbatın azalmasına səbəb olacaq. Bundan başqa paytaxtda məcburi köçkünlərə verilmiş həmin evlərin ucuz qiymətə satışa çıxarılması da əmlak bazarına öz təsirini göstərəcək. Bu ucuz əmlaklar isə bazarda baha satılan əmlakların qiymətinin hansısa bir formada artmasının qarşısını ala bilər”.

“Bakıda əmlakların qiyməti yerləşdiiyi ərazilərinə görə fərqlənir, bu il həmin mənzillərdə qiymətlər necə dəyişəcək” sualına cavab olaraq ekspert bildirib ki, hazırkı vəziyyətdə sadəcə təqvim üzərində tarix dəyişir:

“Qiymətlərin ucuzlaşması, insanların əməkhaqqının artması, daha çox pul qazanması kimi hallar baş vermədiyinə görə, həmin mənzillərin qiyməti olduğu kimi qalacaq Lakin çıxarışı olmayan fərdi həyət evləri çıxarışla təmin olunarsa, məcburi köçkünlər öz evlərinə qayıdarsa, dövlət tərəfindən verilən evlər ucuz qiymətə satışa çıxarılarsa həmin qiymətlərdə stabilləşmə baş verə bilər. Yoxsa ilin sonuna qədər mənzillərin qiymətində ilin sonuna qədər 20-25 faiz artım qaçınılmaz olacaq. Mənzil almaq istəyən şəxslərə məsləhət edərdim ki, bunun üçün də ilin sonunu gözləməsinlər”.

Davud