Azərbaycanda ümumilikdə 1 milyona yaxın sənədsiz ev var. Paytaxtda isə sənədi olmayan evlərin sayının 500 minə yaxın olduğu bildirilir. Uzun illərdir problem müzakirə olunsa da, həllini tapmayıb. 

İqtisadiyyat Nazirliyi yanında Əmlak Məsələləri Dövlət Xidmətinin məlumatına görə, mövcud problemin aradan qaldırılması üçün aidiyyəti dövlət orqanlarının əlaqələndirilmiş fəaliyyəti çərçivəsində müvafiq layihələrin hazırlanması üçün işçi qrupu yaradılıb.

İlkin addım kimi həmin tikililərin təyin olunaraq dövlət qeydiyyatına alınması nəzərdə tutulub. Bu məqsədlə yeni elektron portalın bu ilin sonunadək vətəndaşların istifadəyə veriləcəyi qeyd olunub. 

Bəs hazırda işlər hansı mərhələdədir? Elektron portal nə zaman istifadəyə veriləcək?

Valyuta.az xəbər verir ki, məsələ ilə bağlı Azərbaycan Respublikası İqtisadiyyat Nazirliyi yanında Əmlak Məsələləri Dövlət Xidmətindən Bizim.Media-nın sorğusuna cavab olaraq bildirilib ki, bu portal əsasən, hüquqmüəyyənedici sənədləri olan daşınmaz əmlakların qeydiyyatı ilə bağlıdır:

““Daşınmaz Əmlakın Elektron Reyestri və Kadastrı” informasiya sistemi sənədsiz evlərin qeydiyyata alınmasını deyil, “Daşınmaz əmlakın dövlət reyestri haqqında” Azərbaycan Respublikası Qanununun 8-ci maddəsində nəzərdə tutulmuş hüquqmüəyyənedici sənədləri olan daşınmaz əmlaklar üzərində hüquqların qeydiyyatı prosesinin elektronlaşdırılmasını nəzərdə tutur. 

Bu informasiya sisteminin yaradılmasında məqsəd daşınmaz əmlakın dövlət kadastrı və reyestri sahələrində idarəetmə sisteminin təkmilləşdirilməsi, şəffaflığın və operativliyin artırılması, əmlakın qeydiyyatı ilə bağlı xidmətlərin elektronlaşdırılması və keyfiyyətinin yüksəldilməsi, nəzarət mexanizmlərinin və elektron sənəd dövriyyəsinin genişləndirilməsidir.

Sistemin istifadəyə verilməsi daşınmaz əmlakla bağlı əməliyyatların vahid portal üzərindən aparılmasına, müraciətin elektron qaydada edilməsinə və icra vəziyyətinin izlənilməsinə imkan verəcək”.

Məlumatda bilirilib ki, “Daşınmaz Əmlakın Elektron Reyestri və Kadastrı” informasiya sisteminin yaradılması haqqında Azərbaycan Respublikası Prezidentinin 17 noyabr 2023-cü il tarixli 2354 nömrəli Fərmanının icrası ilə əlaqədar hazırlanmış sənədlər toplusu müvafiq rəyin alınması məqsədilə aidiyyəti qurumlara təqdim olunub.