Türkiyəli iş adamı kimi tanınan Hakan Şengülün Azərbaycan vətəndaşına qarşı dələduzluq etməsi iddia olunur. 

Valyuta.az xəbər verir ki, bu barədə iş adamına aldanan Firdovsi Xəlilov özü məlumat verib. Bildirib ki, 2020-ci ilin oktyabr ayında evin təmir etdirmək qərarına gəlib. Bu məqsədlə Hakan Şengül adlı "iş adamı" ilə təmir işlərinin həyata keçirilməsində razılaşıb: 

“Razılaşmamıza əsasən Şengül mənim üçün aşağıdakı işləri öhdəsinə götürdü: 

1. 45-50 kvm izosistem qapı pəncərə: Türkiyənin Çavadaroğlu firmasının 70 lik profili ilə. Şüşələr 3 qat bişmiş olmalı idi. Aksesuarları isə Almaniya istehsalı. Bu iş üçün məndən 13 940 azn alıb. Noyabrda tam təhvil verməli idi. 

2. Evin santexnika işlərinə görə həm 1 967 manat dəyərində mal-material, həm də 1500 manat işçilik xidməti üçün alıb.

3. Elektirik işləri mal material 2200 + 880 = 3080 manat, işçilik 1200 + 400 = 1600 manat ödəniş alıb.

4. Suvaq işləri üçün bütün ödənişini alıb”.

F.Xəlilovun sözlərinə görə, H. Şengük ondan ötən il dekabrın sonuna qədər özü və köməkçisi vasitəsi ümumilikdə 27 min 695 manat pul alıb: 

“Bunun qarşılığında həm qapı pəncərələr, həm santexnika, həm suvaq, həm də elektirik işləri tamamlanmalı idi”. 

Dekabr sonunda pəncərələrin gecikdiyini deyən F.Xəlilov “iş adamı”na çoxsaylı müraciətlər etdiyini, nəticədə “Ulduz” metrosu yaxınlığında bir zavodda görüşdüklərini bildirib: 

“Hakan məni zavoda apardı və orda söz verdiyini deyil, yerli firmanın malını göstərdi. Guya mənim pəncərələrim olduğunu dedi. 1 həftə vaxt istədi. “Kişi kimi” söz verdi ki, 1 həftəyə sənin işlərin tamamlanır". 2 gün sonra o zavoda gedib rəhbərlərini tapdım. Mənə dedilər ki, nə sənin, nə Hakanın burda malı yoxdur. Bizə dedi ki müştəri mala baxıb pul verəcək, ona görə profilləri göstərdik". 

Beləliklə, Hakanın onu aldatmasından şübhələnən F.Xəlilov evdə işləyən ustaları sorğu-sual edib. Məlum olub ki, Hakan fəhlələrin də pullarının çox hissəsini verməyib: 

“Amma məndən bütün xərcləri son qəpiyinə kimi alıb. Şengül məndən santexnika malları üçün aldığı pulu da öz jarqonları ilə desək "fırladıb". Ustaların da zəhmət haqlarını vermədiyi üçün fəhlələr işlərini dayandırdılar”.

F.Xəlilov H.Şengülün "qəhramanlıqlarından” Daxili İşlər Nazirliyinə, Türkiyə səfirliyinə, MÜSİAB-a şikayət etdiyini deyib. Şəxsi araşdırmalarını da davam etdirib: 

“Hakan haqqında məlumatlar almağa başladım. Məlum oldu ki, o adam həqiqətən işinin "peşəkarı"dır. Və bu cür işlərdə heç də tək deyilmiş. Deyilənlərə görə, arxasında “sehirli”, güclər varmış. Necəsə olur Şengülə açılan cinayət işlərinə və s. proseslərə əsrarəngiz şəkildə xitam verilirmiş. Onu da deyim ki, Hakanın ilk qurbanı mən deyiləm. O bu günə kimi məndən qat-qat güclü və nüfuzlu şəxslərə və iş adamlarına da bu cür fırıldaq gəlib. Hətta bəzilərini borclu çıxarıb. İşi yarımçıq qalan adam polisə, məhkəməyə şikayət edir, mülki iş başlayır. Bu müddət ərzində həmin şəxs öz obyektinin yarımçıq qalan işlərini tamamlayır. Və bir gün Hakanın ekspertləri gəlir ki, həmin obyektdə 200-230 min manatlıq iş görülüb və həmin adam Hakana 100 min və ya 70 min manat borcludur”.

F.Xəlilov əlavə edib ki, onun DİN-ə etdiyi müraciəti Xətai rayon Polis İdarəsində araşdırılır. Ekspertiza rəyləri əldə edildikdən sonra ona rəsmi cavab veriləcək.  

Məsələ ilə bağlı qarşı tərəfin fikirlərini dinləməyə hazırıq.