Səudiyyə Ərəbistanında Cənubi Koreyanın "Samsung C&T" şirkətinin iştirakı ilə tikilən metro bazar günü ölkənin paytaxtı Ər-Riyadda fəaliyyətə başlayıb.  

Valyuta.Az "Yonhap" agentliyinə istinadən xəbər verir ki, "Samsung" qrupunun tikinti və mühəndislik bölməsi olan "Samsung Construction & Trading" ("Samsung C&T") "Riyad Metro" layihəsinin 1-ci, 4-cü və 6-cı xətlərinin açılışını elan edib. Bu layihə, Səudiyyə Ərəbistanının vəliəhd şahzadəsi Məhəmməd bin Salmanın (Mohammed bin Salman) irəli sürdüyü "Vision 2030" proqramının əsas infrastruktur hissələrindən biridir.  

2-ci və 5-ci xətlərin 15 dekabrda, 3-cü xəttin isə 5 yanvarda fəaliyyətə başlaması planlaşdırılır.  

Qeyd edilir ki, "Samsung C&T" İspaniyanın "FCC Construction" şirkəti və digər tərəfdaşlarla birgə Ər-Riyadda ümumi uzunluğu 176 kilometr olan altı metro xəttinin tikintisini həyata keçirib.

Cənubi Koreya şirkətinin məlumatına görə, Kral Salman bin Əbdüləziz çərşənbə günü keçirilən açılış mərasimində metro xidmətlərinin başlanmasını elan edib.  

Rəhim