“İşğaldan azad olunan bölgələrə 12 milyard manata kimi daxili investisiya qoyuluşu nəzərdə tutulub”.

Bunu Valyuta.az-a açıqlamasında iqtisadçı ekspert Eyyub Kərimli deyib. Ekspert “Böyük qayıdış” proqramı çərçivəsində artıq 10 min əhalinin ora köçürülməsinin planlaşdırıldığını vurğulayıb:

“Füzuli və Ağdam rayonlarunda geniş inşaat işləri gedir, Laçın rayonunda məskunlaşmaya start verilib. Zəngilanın Ağalı kəndi müasir tələblərə cavab verəcək səviyyədə qurulur. Həmçinin orada yeni aeroportun tikilməsi iqtisadi imkanlar yaradır, aqroparklar salınıb. Hesab edirəm ki, digər bölgələr üçün gələcəkdə xarici investisiyanın cəlb edilməsi daha aktual olacaq”. 

Ekspert hesab edir ki, Ermənistanla Azərbaycan arasında sülh müqaviləsinin uzanması bu prosesdə ləngimələr yaradır:

“Sərhədin delimitasiyası gələcəkdə bu bölgələrə daha çox investisiyanın yatırılmasına yol açacaq. Həmçinin Zəngəzur dəhlizinin fəaliyyətə başlaması bu sahədə imkanları genişləndirəcək. Bilirsiniz həmin bölgələrə Səudiyyə Ərəbistanı şirkəti tərəfindən 250 milyon dollara yaxın vəsait qoyulub. Çünki həmin bölgələrin alternativ və bərpa olunan enerji imkanları var. Türkiyə tərəfindən bir neçə aqroparkın inşa edilməsi nəzərdə tutulub. Prezidentin bununla bağlı açıqlaması var ki, biz həmin bölgələrimizi daha çox öz daxili vəsaitimiz hesabına qurub-yaradırıq və başqa ölkələrdən bir manat da əlavə vəsait almırıq”.

Ekspertin fikirincə, xarici ölkələrin Qarabağa marağı çoxdur:

“Bu baxımdan gələcəkdə sülh müqaviləsinin imzalaması məsələni daha da sürətləndirəcək. Hazırda xarici şirkətlər bununla bağlı müraciət edirlər və onlara baxılır. Daha çox İsrail şirkətlərinin kənd təsərrüfatı, suvarma sistemlərinin təkmilləşdirilməsi sahəsinə əlavə investisiya qoyuluşu var. Bundan əlavə İtaliya şirkətlərinin də bu bölgəyə investisiya qoymaq maraqları var. Bütün bu kimi müraciətlərə baxılır”.

Aylin