Pandemiya dövründə texnologiya startaplarına geniş miqyasda sərmayə qoyan "Coatue Management" hedc fondu, süni intellektə yönəlmiş şirkətləri dəstəkləmək məqsədilə 1 milyard dollar vəsait toplamağı planlaşdırır. 

Valyuta.az xəbər verir ki, bu barədə məlumatı "Bloomberg" yayımlayıb.

Şirkətin əsas fonduna gələcək bu maliyyənin əsas hissəsi institusional investorlar* tərəfindən təmin ediləcək. Bununla yanaşı, "Raymond James and Associates" brokerlik şirkətində hesabı olan yüksək gəlirli şəxslər də "Coatue"ya investisiya qoya biləcəklər.

"PitchBook"un məlumatına əsasən, hazırda idarəsində təxminən 50 milyard dollar olan "Coatue", 2021-ci ildə 170-dən çox startapa sərmayə yatırmışdı. Bununla belə, "Coatue" 2022-ci ildə 81, 2023-cü ildə isə təxminən 30 şirkəti dəstəkləyərək investisiya tempini xeyli azaltdı.

Buna baxmayaraq, "Coatue" özəl şirkətlərə yatırımlarına son qoymayıb. 2024-cü ildə fond artıq 29 startapa dəstək verib. Şirkətin son süni intellekt yönümlü yatırımları arasında "Glean", "Scale AI" və ümumi məqsədli süni intellekt robotu yaradan "Skild AI" də yer alır. "Coatue"nun təsisçisi Filip Laffont süni intellektlə işləyən humanoid robotların xüsusilə maraqlı olduğunu qeyd edib.

* İnstitusional investor - Müştərilərinin adından maliyyə bazarı alətlərinə böyük həcmdə investisiya edən maliyyə institutları. 

Rəhim