Qlobal internet sürətini ölçən Speedtest.net saytının sahibi Ookla şirkəti yeni reytinq siyahısı dərc edib.

Birləşmiş Ərəb Əmirliklərinin (BƏƏ) ən iri telekommunikasiya şirkəti Etisalat (Emirates Telecommunication Group Company) ardıcıl 2-ci il dünyanın ən sürətli mobil internet operatoru seçilib.

Saniyədə 193.88 meqabit orta yükləmə sürəti ilə Etisalat iyul 2020-iyul 2021 dövründə Speedtest reytinqində 150 balı keçən yeganə mobil operator olub. Şirkət hazırda 5-ci nəsil simsiz mobil internet (5G) texnologiyalarını geniş tətbiq edir.  

1976-cı ildə qurulmuş Etisalat BƏƏ-də yeganə internet provayderidir. Şirkət ötən ili 14 milyard dollardan çox gəlir və 2,5 milyard dollar xalis mənfəətlə başa vurub. Etisalat-ın hazırkı bazar dəyəri təxminən 53 milyard dollara yaxındır. 

BƏƏ həm də qlobal indeksdə cari ilin yanvar-iyun aylarında mobil internetin orta yükləmə sürətinə görə liderdir. İlk 5-likdə daha sonra Cənubi Koreya, Qətər, Çin və Kipr gəlir.

Sabit genişzolaqlı internet sürətinə görə isə siyahıya Monako başçılıq edir (256,70 meqabit/saniyə). Sonrakı yerləri Sinqapur, Honq Konq, Tayland və Rumıniya tutur.

Mənbə: Marja.az