Almaniyada fəaliyyət göstərən son üç Atom Elektrik Stansiyası (AES) - "Isar-2", "Neckarwestheim-2" və "Emsland" şəbəkədən ayrılıb.

Qaynarinfo DW-yə istinadən xəbər verir ki, Baden-Vürtemberq federal əyalətindəki "Neckarwestheim-2" stansiyası elektrik şəbəkəsindən ayrılan sonuncu AES olub. Bu, aprelin 15-də, yerli vaxtla saat 23:59-da baş verib.

Almaniyanın ətraf mühit naziri Şteffi Lemke bununla bağlı deyib: "Nüvə enerjisinin riskləri son nəticədə idarəolunmazdır, ona görə də onun mərhələli şəkildə ləğv edilməsi ölkəmizi daha təhlükəsiz edir və nüvə tullantılarının daha çox yığılmasının qarşısını alır”.

Almanların təxminən 2/3-si ölkədəki sonuncu AES-lərin bağlanmasını dəstəkləmir. "YouGov" Sosioloji İnstitutunun sorğusuna qatılan respondentlərin 32 faizi AES-lərin fəaliyyətinin məhdud müddətə, daha 33 faizi isə hətta qeyri-müəyyən müddətə uzadılmasının tərəfdarıdır. Respondentlərin yalnız 26 faizi Almaniyada qalan bu tip stansiyaların dərhal bağlanmasını düzgün hesab edir.

"Biz qanunun tələblərinə uyğun olaraq fəaliyyət göstəririk və burada reaktorun işini aprelin 16-dan davam etdirmək şübhəsiz ki, cinayət məsuliyyəti olardı”, deyə Almaniyanın nüvə stansiyasına nəzarət üzrə işçi qrupunun rəhbəri, ekologiya və nüvə nəhlükəsizliyi naziri Gerrit Niehaus deyib. 

Almaniyada nüvə texnologiyalarını inkişaf etdirən şirkətlərin maraqlarını təmsil edən KernD assosiasiyası nüvə enerjisi ilə vidalaşmanın pis fikir olduğunu bildirib:

"Az miqdarda istixana qazları istehsal edən üç nüvə enerji blokunun bağlanması ilə bağlı qərar aydın deyil. Elektrik təchizatının etibarlılığı, ətraf mühitin və iqlimin qorunması, eləcə də rəqabət qabiliyyəti məsələlərini birlikdə nəzərdən keçirsək, daha çox nüvə enerjisi məntiqlidir".

Qeyd edək ki, 2011-ci ildə Almaniyanın o zamankı kansleri Angela Merkel Yaponiyada "Fukusima-1" AES-də baş vermiş qəzadan sonra AES-lərdən imtina etmək qərarına gəlib. Hökumət koalisiyası Almaniyanın 2011-ci ildə nüvə proqramının mərhələli şəkildə dayandırılması planını dəstəkləyib.