Ötən ilin nəticələrinə görə, təsdiq edilmiş qlobal təbii qaz ehtiyatları 2019-cu ilin sonuna olan göstəricilərlə müqayisədə 0,4% azalaraq 206,7 trln. kubmetr təşkil edib.

Neft İxrac Edən Ölkələr Təşkilatının (OPEC) illik statistik bülleteninə əsasən, dünyada təsdiq edilmiş təbii qaz ehtiyatları üzrə lider Rusiya olaraq qalıb. 

Ölkənin ehtiyatları hesabat dövründə 0,4% azalaraq 48,9 trln. kubmetr təşkil edib.

Qeyd olunur ki, qlobal səviyyədə təsdiq edilmiş qaz ehtiyatları üzrə ikinci yerdə İran olaraq qalıb. Bu ölkənin ehtiyatları bir il ərzində 0,3% artaraq 34 trln. kubmetr çatıb. Sözügedən göstərici üzrə üçüncü yerdə 23,8 trln. kubmetr ilə Qətər qərarlaşıb.

Hesabata əsasən, dünyada təsdiq edilmiş qaz ehtiyatları üzrə dördüncü yerdə 15,4 trln. kubmetrlə (+10,1% ) Türkmənistan, beşinci yerdə 13 trln. kubmetrlə (-3,6%) ABŞ, altıncı yerdə isə 8,4 trln. kubmetrlə (-10,5%) Səudiyyə Ərəbistanı qərarlaşıb.

Bu reytinqin yeddinci, səkkizinci, doqquzuncu və onuncu pillələrini isə müvafiq olaraq Birləşmiş Ərəb Əmirlikləri (BƏƏ), Nigeriya, Venesuela və Əlcəzair bölüşdürür. 

Mənbə: "APA-Economics"