SOCAR 2021-ci ilin yanvar-avqust aylarında Bakı-Novorossiysk neft kəməri ilə 668,37 min ton neft ixrac edib. 

Valyuta.az xəbər verir ki, bu barədə Rusiya Energetika Nazirliyinin Yanacaq-Energetika Kompleksinin Mərkəzi Dispetçer İdarəsinin məlumatında deyilir.

““Transneft” şirkətinin sistemi üzrə cari ilin yanvar-avqust aylarında Azərbaycandan Novorossiysk limanına 668,37 min ton, avqustda isə 85,08 min ton neft nəql olunub”, - deyə “İnterfaks-Azərbaycan” agentliyinin əldə etdiyi məlumatda bildirilir.

Ötən ilin yanvar-avqust ayları ilə müqayisədə Bakı-Novorossiysk kəməri ilə Azərbaycan neftinin ixrac həcmi 3,4 dəfə artıb.

Yanvar ayının sonunda SOCAR və “Transneft” arasında 2021-ci ildə Bakı-Novorossiysk neft kəməri ilə 1 milyon tondan çox neftin nəqli haqqında müqavilə bağlanıb.

Mərkəzi Dispetçer İdarəsinin məlumatına görə, SOCAR 2020-ci ildə Bakı-Novorossiysk kəməri ilə 613,29 min ton neft ixrac edib.

Azərbaycan 1997-ci ildən öz neftini Bakı-Novorossiysk kəməri ilə nəql edir.