Azərbaycanın tərəvəz ehtiyatı 2 milyon 200 min tonu keçib. Tərəvəzlərin 1,4 milyon tonu əhali tərəfindən istehlak edilib, 180 min tonu xaricə ixrac olunub, 130 min ton tərəvəz isə itkiyə gedib.

130 min ton tərəvəzin itkisinin qarşısını necə almaq olar?

Mövzu ilə bağlı Valyuta.az-a danışan iqtisadçı Akif Nəsirli bildirib ki, bu halları aradan qaldırmaq, itkiləri azaltmaq üçün bu sahə ilə bağlı müəyyən tənzimlənmə həyata keçirilməlidir:

“Əvvəlcə bazarın tələbatı və fermerlərin istehsal potensialı da eyni qaydada müəyyənləşməlidir. Mövsüm başlayana qədər müəyyən olunmalıdır ki, hansı tərəvəz və kənd təsərrüfatı məhsulları tələbatdan artıq istehsal edilir, hansı məhsulun isə daha artıq istehsalına ehtiyac var. Artıq məhsullar mövsüm başlayan kimi hökumət tərəfindən alınmalıdr ki, bazarda artıqlıq yaranaraq, qiymətlər ucuzlaşmasın. Amma çatışmayan kənd təsərrüfatı məhsulunu, meyvəni, tərəvəzi isə hökumət sahibkarlara sifariş verməli, xaricdən sifariş etməlidir, bununla da bazarın tələbatını ödəməlidir”. 

Həmsöhbətimiz qeyd edib ki, meyvə-tərəvəz dedikdə, bu ifadənin altında çox geniş çeşidli məhsullar dayandığını nəzərə almalıyıq:

“Bəzən mövsümündə yetişdirlən meyvə və tərəvəz artıqlıq edir. Məsələn, yay aylarında qarpız çox istehsal olunur və bazarın tələbatından çox olur. Bu zaman qiymətlər ucuzlaşır, hətta ucuzlaşma o həddə çatır ki, həmin məhsulları bazara çatdırmaq mümkün olmur. Bir neçə həftə bundan əvvəl bir video izlədim ki, sahibkar laped dolu qarpızı kanala tullayırdı. Bu kimi nümunələr mövcuddur. Belə nümunənin olmaması üçün isə tələbat əvvəlcədən müəyyənləşdirilməlidir”.

Akif Nəsirli deyir ki, bütün bu proseslərə qədər isə Azərbaycan iqtisadiyyatının kənd təsərrüfatı seqmentində çoxlu görüləsi işlər var:

“Birmənalı olaraq fermerlərin böyük şəhərlərdəki bazarlara birbaşa, maneəsiz çıxışı təmin olunmalıdır. Onların öz məhsullarını satmaq üçün həm rayonlarda, həm böyük şəhərlərdə şərait yaradılmalıdır. Hazırda Azərbaycan fermerlərinin Bakı şəhərindəki heç bir bazara birbaşa çıxışı yoxdur. Bütün bunlar həyata keçiriləndən sonra meyvə, tərəvəzlərin itkisi dəfələrlə azala və ya ümumiyyətlə aradan qaldırıla bilər”.

Davud