Kriptovalyuta bazarı yaxın günlərdə azalmağa davam edə bilər. 

Valyuta.az xəbər verir ki, bu barədə kriptovalyuta bazarının analitiki Viktor Perşikov Gazeta.Ru ilə söhbətində danışıb.

Onun sözlərinə görə, bitkoinin hazırkı 52 min dollardan məzənnəsi 45-47 min dollara, bütün bazarın kapitallaşması isə 1,5 trilyon dollara qədər azala bilər.

Ekspert qeyd edib ki, kapitallaşmaya görə ikinci ən böyük kriptovalyuta olan Ethereum da indiki 2280 dollardan 2000 dollardan aşağı düşə bilər.

Perşikov vurğulayıb ki, azalma gözlənilməz adlandırıla bilməz və bunun üçün şərait əvvəlki bir neçə ayda formalaşıb.

Onun sözlərinə görə, azalma iri bazar iştirakçıları tərəfindən satış həcminin artması və Mt.Gox birjasının kreditorları arasında əhəmiyyətli vəsaitlərin bölüşdürülməsi ilə bağlıdır. Hər iki amil kriptovalyuta təklifinin tələbi üstələməsinə səbəb olub.

Bundan əlavə, kriptovalyuta bazarı ABŞ-da tənəzzül riskləri səbəbindən Amerika və Yaponiya fond indekslərinin düşməsindən təsirlənib.

Analitik qeyd edib ki, hazırkı azalmaya baxmayaraq, bazarın uzunmüddətli perspektivləri müsbət olaraq qalır. O xatırladıb ki, üçüncü rüb ənənəvi olaraq kriptovalyutalar üçün zəif dövrdür.

Perşikov bazarın dördüncü rübdə bərpa olunacağını gözləyir. Buna qlobal mərkəzi bankların maliyyə bazarlarını sabitləşdirmək üçün atdığı addımlar kömək edə bilər. Bununla belə, analitik kriptovalyutaların avqustun sonuna qədər təzyiq altında qala biləcəyi barədə xəbərdarlıq edib.

Nicat