![](https://valyuta.az/file/articles/2024/07/03/1720009094_17198282864532964743_1200x630.jpg)
İşi görüb pulunu ala bilməyən ustalar hara müraciət etməlidir?
Azərbaycanda ev tikintisi və təmiri sahəsində qeyri-rəsmi çalışan ustalar çoxdur. Bir çox hallarda qeyri-rəsmi çalışan həmin ustalar gördüyü işin müqavilində ev, obyekt sahibindən pulu ala bilmirlər. İşi bitirəndən sonra həmin ev sahiblərinə zəng çatmır, əlaqə yaratmaq mümkün olmur. Həmin ustalar da müqavilə ilə işləmədikləri üçün polisə, məhkəməyə müraciət etməkdən çəkinirlər. Bu kimi hallarda polisə və ya məhkəməyə müraciət olunarsa, ustanın pulunu alması təmin edilə bilərmi?
Valyuta.az-a danışan Vəkillər Kollegiyasının üzvü, hüquqşünas Rəşad Əliyev deyir ki, tərəflər arasında xidmətin göstərilməsi ilə bağlı müqavilə bağlanmadığı üçün bu kimi problemlər çox yaşanır: “Müqaviləsiz işləmək qanun pozuntusudur. Çünki qanun hər iki tərəfin hüquqlarını təmin edir. Müqavilə olmayanda, gələcəkdə tərəflərin hər ikisi üçün problemlər yarana bilir”.
R.Əliyev bildirdi ki, ancaq müqavilə olmasa belə, öhdəliyi yerinə yetirməyən tərəfdən vurulan ziyanı geri almaq üçün məhkəməyə müraciət edilməlidir: “Mülki xarakterli iş olduğu üçün məhkəməyə müraciət edilməlidir. Məhkəməyə müraciət edən zaman da sübutetmə vəzifəsi iddiaçının üzərinə düşür. Belə bir borcun yarandığını, zərərin vurulduğunu sübut etmək vəzifəsi onun üzərinə düşdüyü üçün sübutlar təqdim etməlidir. Əgər belə sübutlar yoxdursa, bu zaman iddiaçı itirən tərəf olur, dəymiş ziyanı ala bilmir. Əməlin mülki xarakterli deyil, dələduzluq xarakterli olduğu aşkar olunarsa, bu halda, polisə müraciət oluna bilər.
Dələduzluq əməli varsa, dələduzluğa görə məsuliyyətə cəlb oluna bilər və dəymiş ziyanın ödənilməsi ilə bağlı mülki iddia verə bilər”.
Hüquqşünas bildirdi ki, iddiaçı işin faktiki hallarını təsdiq edən bütün hallarla bağlı sübutları təqdim edə bilər:
“Məhkəmədə ustanın gördüyü işin fotoları, şəkilləri sübut kimi göstərilə bilər. Usta tək işləmirsə, onun yanında yoldaşları da varsa, bu da sübut kimi göstərilə bilər. Sübutlara qiymət vermə məhkəmənin səlahiyyətindədir. Yəni, məhkəmə həmin sübutlar əsasında həmin şəxsin haqlı olduğu qənaətinə gələrsə, şəxsin iddiasını təmin edə bilər”.
Əvəz Həsənov
Mətndə səhv varsa, onu qeyd edib ctrl + enter düyməsini basaraq bizə göndərin.
Son xəbərlər
Ən çox oxunanlar
- Bu gün
- Bu həftə
- Bu ay