“Yerlər məhddudur”, “Son biletlər qalıb”, “Biletlərin 80 faizi satılıb”, “Son 4-5 yer üçün yazılın” kimi elanlar görürük. Xüsusilə turlar, təlimlər, forumlar və s. bilet satışında buna rast gəlirik. Bu məhdudlaşdırıcı elanlar satışa təsir edir?

Valyuta.az-a danışan biznes konsultant Solmaz Yaqubova bildirdi ki, bu kimi çağırışlar insanlara təsir edir. Çünki insanlar nəyinsə məhdud olduğunu düşünən zaman ona daha çox can atırlar:

“Məsələn, “Son biletlər qalıb” ifadəsi o deməkdir ki, məhsul limitlidir. Bu zaman insanlar bunun daha dəyərli olduğunu düşünürlər və ona sahib olmaq istəyi də bununla paralel olaraq artır. Bu insanlarda elə bir fikir formalaşdıra bilər ki, deməli, bu konsert çox sevilən konsertdir. Əgər hamı bu konsertə gedirsə, deməli, yaxşıdır. Biletlər də limitli olduğu üçün daha tez əldə etməyə çalışırlar. Həmçinin burada zaman məhdudiyyəti də olur. İnsanlar nələrisə gecikdirməyə daha meyilli olurlar, amma zaman limitləməsi olan zaman insanlar daha tez qərar verib, hərəkətə keçməyə başlayırlar. İnsanlar limitli sayda olan məhsullara sahib olduğu zaman özlərini daha özəl, daha statuslu hiss edirlər. Burda əsas satılan məhsul yox, onun verdiyi duyğudur”. 

Biznes konsultant deyir ki, bütün bunlar hamısı marketinq strategiyalarına daxildir. Müxtəlif bizneslər hədəf kütlələrinə uyğun olaraq fərqli marketinq strategiyaları istifadə edirlər:

“Çox vaxt bu marketinq strategiyaları insanların psixoloji vəziyyətinə uyğun olaraq hazırlanır. Məhsulu satan zaman onun verəcəklərini önə çıxarmaq lazımdır. Məsələn, siz dərman hazırlayırsınız burada müxtəlif maddələrdən istifadə olunur, amma müştərilər bunu bilmir. Sizin hazırladığınız dərman baş ağrısını kəsmək üçündürsə, “Bu dərmanı içdiyiniz zaman 15 dəqiqəyə baş ağrısı qalmır” kimi ifadələr işlətməniz qarşı tərəfə verdiyiniz bir nəticədir. İnsanlar da sizdən məhsul alan zaman bu nəticəni istəyirlər. Bizim az əvvəl danışdığımız “Yerlər məhddudur”, “Son biletlər qalıb” kimi ifadələr isə onların daha az düşünməyinə və daha tez qərar verməyinə səbəb olur. Çünki günümüzdə insanlar çox qərarsızdırlar. Limitsiz sayda reklamlar var ki, onların qarşısına çıxır və onların arasında seçib qərar vermək insanlar üçün çətindir. Amma siz məhdudiyyətlər qoyduğunuz zaman insanlar bunu bir daha əldə edə bilməyəcəklərini düşünərək daha tez hərəkətə keçə bilirlər”.

Əvəz Həsənov