Mərkəzi Bank “Meqa Sığorta” ASC-nin “Kiber risklərin sığortası” Qaydalarını təsdiq edib. Bu, o deməkdir ki, Azərbaycanda yeni sığorta məhsulu olan kiber risklərin sığortası yaradılıb. Son zamanlar kiberdələduzluq halları çox olduğu üçün belə bir məhsulun yaranması vacib idi. Yəqin ki zamanla sığorta bazarında bu sığorta növünü təqdim edən digər şirkətlər də olacaq. Bəs bu sığorta məhsulundan daha çox kimlər istifadə edəcək? Kiberhücumlar vasitəsilə bəzən çox böyük məbləğlər ələ keçirilir, bunların qarşılanması məsələsini sığorta şirkətləri necə həll edəcək?

Valyuta.az-a danışan sığorta eksperti İlkin İbrahimov deyir ki, dünyada olduğu kimi ölkəmizdə də, kiberhücumlarla bağlı məsələlərdə çox böyük problemlər yaşanır:

“Bank kartlarından çoxlu məbləğdə vəsaitlərin kiberhücumların qurbanı olduğunu görürük. Belə fürsətlərlə bağlı həmişə sığorta şirkətləri yeni məhsullar yaratmağa çalışır. Kiberhücumlarla bağlı müxtəlif növ təminatları təklif edərək vətəndaşlara bu növ sığortadan yararlanmağı təklif edir. Bununla kiberhücumlar zamanı məbləğlərin itirilməsi zamanı sığorta ödənişlərinin verilməsi nəzərdə tutulur. Bu məhsul geniş əhatə dairəsi üçün nəzərdə tutulub. Xüsusilə də, şirkətlər və sahibkarlar üçün əhəmiyyətli olacaq. Çünki onların riskləri vətəndaşların risklərindən daha böyük olur”.

Ekspert bildirdi ki, risklər böyük olduğu zamanlar sığorta şirkətləri də özlərini sığortalayacaqlar:

“Sığorta şirkətləri daha böyük risklərlə bağlı təkrarsığortada yenidən həmin riskləri təkrarsığorta edirlər. Risklər daha böyük olan zaman təkrarsığorta şirkətləri ilə müştərək olaraq sığorta ödənişlərini həyata keçirirlər”.

İ.İbrahimov qeyd etdi ki, ümumiyyətlə, ölkəmizdə yeni sığorta məhsulları son bir-iki ildə passiv dövrünü yaşayırdı. Yeni sığorta məhsullarının yaranması sığorta şirkətlərindən və nəzarətedicinin nəzarətindən asılı olur:

“Yəni, məcburi xarakter daşıyan sığorta məhsulları var. Məsələn, avtomobil nəqliyyatı vasitələrinin mülki məsuliyyəti sığortası və ya daşınmaz əmlak sığortası ilə bağlı sığorta növləri mövcuddur. Görünən də odur ki, sığorta şirkətləri bu sığorta məhsullarını satmaqdan məmnundurlar, eyni zamanda digər məhsulların daha çox risk daşıdığını nəzərə alaraq yeni sığorta məhsulu yaratmağa risk etmirdilər. Daha çox passiv formada davam edirdilər”.

Əvəz Həsənov