“Hər bir təsərrüfat sahibi baş verən hadisələrdən özünü sığortalamalıdır. Bura təkcə heyvanlar yox, əkin sahələri, bitkilər də aiddir. Aqrar Sığorta bu sahədə bir çox riskləri qarşılayır. Fermerlər təkcə tələf olan heyvana görə deyil, xəstə heyvana görə də kompensasiya ala bilər. Bundan başqa, təsərrüfat sahiblərinə güzəştlər də tətbiq olunur. Sığorta haqqının yarısı zərərçəkmişə dövlət tərəfindən ödənilir”

Bunu Moderator.az-a açıqlamasında ekspert Emil Ağabağırov deyib.

“Burada iri və xırdabuynuzlu heyvanlar olmaqla, bitkiçilik sığortası da etmək mümkündür. 41 növ bitki və bitkiçilik təsərrüfatı üzrə sığorta predmetlərini sığorta edə bilərik. Bu könüllü sığorta növü olduğuna görə hər hansı ev quşlarının və yaxud da digər canlıların, ev heyvanlarının sığortası artıq sığorta şirkətləri tərəfindən könüllü təklif oluna bilər. Könüllü sığorta növlərində elədir ki, hər hansısa şirkətlər dəyişiklik edə bilərlər. Təminatları artıra bilərlər, istisnaları əlavə edə bilərlər. Orada da yaş kateqoriyaları, eyni zamanda ətlik, südlük heyvanlara görə ayrılır. Ona diqqət etmək lazımdır. Ötən il ən çox sığortalanan əkinlər-buğda, arpa, pambıq, qarğıdalı, fındıq, şəkər çuğunduru, çəltik və üzüm sahələri, eləcə də meyvə bağları olub”, - deyə ekspert bildirib.