Çin və Cənubi Koreyadan Azərbaycana gələn turistlərin sayının artmasının səbəbi nədir?

“Hansı ölkələrlə Azərbaycanın dostluq və diplomatik münasibətləri varsa həmin ölkələrdən gələn turistlərin sayında aktivlik görürük”.

Bunu Valyuta.az-a açıqlamasında iqtisadçı ekspert Fuad İbrahimov Çindən və Cənubi Koreyadan Azərbaycana gələn turistlərin sayının artmasının səbəblərindən danışarkən deyib. Ekspert bildirib ki, Azərbaycan iki qitə arasında ən elastik dəhlizlərindən biridir:

“Bundan da çox məharətlə istifadə edə bilirik. İstər xarici siyasət, istər ölkənin iqtisadi dayanıqlığı, istərsə də vaxtında lazım olan maraq, cazibədarlığı artıran layihələri həyata keçirməklə və s. Mən Çindən Azərbaycana gələn turistlərin iqtisadi maraqlarını daha üstün tuturam. Çünki Azad İqtisadi Zonanın yaranması, xüsusən də işğaldan azad olunmuş rayonlardakı torpaqlara investisiyaların qoyulması məqsədi ilə həyata keçirilən layihələrdə Çin Azərbaycanı stateji patnyorlar sırasında görür”.

Fuad İbrahimov qeyd edib ki, turistlərin Azərbaycana cəlb olunmasında Azərbaycanın xeyli infrastruktur imkanları və iqtisadi göstəriciləri var:
“Çindən Azərbaycana gələn turistlərin say artımını nəzərə almaqla bir məqama toxunmalıyıq ki, Çin biznes imkanlarına görə bizim üçün çox önəmli regionlardandır. Çindən Azərbaycana iki həftə ərzində ticarət dövriyyəsinin çatdırılması mümkündür. Qardaş Türkiyə ilə Çinin xeyli ticarət dövriyyəsi var. Gələcəkdə Çindən Azərbaycan gələn turistlərin sayının artması davam edəcək”.

Qeyd edək ki, Dövlət Statistika Komitəsinin məlumatına görə, Çin və Cənubi Koreyadan Azərbaycana gələn turistlərin sayı 2022-ci illə müqayisədə 6, 5 dəfə artıb.

Aylin