“Linkedin”dən istifadə Azərbaycanda da geniş yayılıb. Əsasən iş adamları bu sosial şəbəkədən istifadə etməyə üstünlük verir. Çünki bu sosial şəbəkədə müxtəlif işlərlə məşğul olan, müxtəlif işlər üzrə ixtisaslaşan insanları tanıya bilərsiniz. “Linkedin” online CV, portfolio xarakteri daşıyır. Bəzi şirkətlər işçi, mütəxəssis axtararkən “Linkedin”dən axtarırlar. Bir sözlə, “Linkedin” profiliniz sizin iş tapmağınızda önəmli rol oynaya bilər.

“Linkedin”də iş axtaranlar üçün “open to work” var. Siz onu profilinizdə qeyd etsəniz, iş axtarırmış kimi görünəcəksiniz. Dünya təcrübəsində belədir.

“HR Hunter” şirkətinin qurucusu, İnsan Resursları üzrə konsultant İlkin Mirzəzadə Valyuta.az-a dedi ki, Azərbaycanda vəziyyət fərqlidir:

Xaricdə “open to work” olanda düşünürlər ki, iş axtarır, aktivdir. Amma bizdə tələbə də, işsizlər də, işi olanlar da “open to work” edir”. Hətta “Open to work”ü açanda elə təəssürat yaranır ki, “hələ ki, işə ehtiyacım yoxdur, sadəcə açıq qalıb”. Hətta elə olur ki, aylarla açıq qalıb. Yəni iş tapır, o işarəni profilindən götürmək yadından çıxır. Və yaxud düşünür ki, hər ehtimala qarşı qalsın”.

İlkin Mirzəzadə bildirir ki, Azərbaycanda “open to work”ə el arasında ad da qoyublar:

“Yaşıl ot” deyirlər. Yəni otluq basmış bir profil təəssüratı yaradır. Çünki biz artıq bilirik ki, o iş axtarmasa da, “open to work” edə bilər. Belə nəticəyə gəlinir ki, aktiv istifadəçi deyil. Yəni “open to work” Azərbaycandakı praktikada çox da işə yaramır. Onunla bağlı belə bir düşüncə yaranır ki, yazıqdır, iş axtarır. Və ya bu iş axtarırsa, deməli işlə bağlı ciddi problemləri var, dərhal çıxmaq istəyir. Buna indiki aldığı maaşdan çox da yüksək olmayan əmək haqqıya da cəlb etmək olar. Praktikada bunu da görürük”.

Nuray