“Əsl çörək, tərkibi nəmişlənən olan çörək kiflənməlidir. Otaq tempraturundan 2-3 gün qalan çörək kiflənmirsə həmin çörəyin tərkibində kalsium propionat maddəsinin olması ehtimalı yüksəkdir”. 

Bu sözləri Valyuta.az-a qida mütəxəssisi Ağa Salamov bəzi çörək və yuxa məhsullarının gec xarab olması haqqında danışarkən deyib. 

Ağa Salamov deyir ki, kalsium propionat deyilən maddə un məmulatlarında, makaronlarda, çörək, lavaş istehsalında, qənnadı məhsullarında, süd məhsullarının tərkibində istifadə olunur:

“Bu maddə qida məhsullarının köhnəlməsinin, nəmliyinin qarşısını alır. Bu da məhsulun rəf ömrünü uzadır, kiflənmədən qoruyur. Düzü, mən inanmıram ki, bu gün çörək zavodlarında bu maddədən istifadə olunur. Ancaq yenə də istifadə olunursa, bunun istifadəsində doza aşılmamalıdır. Buna isə AQTA nəzarət edir. Birbaşa AQTA-nın icazə verdiyi qida qatqı maddələrindən istifadə olunmalıdır”. 

Qida mütəxəsisi deyir ki, çörəyi ən birinci nəmişlikdən qorumaq lazımdır:

 “Tez kiflənməməsi üçün nəmişlik olan ortamdan uzaq tutmaq lazımdır. Bəzən görürük ki, marketlərdə çörəyi o qədər sıx yığırlar ki, tərləyir, alıb evə gətirəndə də otaq tempraturunda tez kiflənir. Çörəyin düzgün daşınması, saxlanması, rəflənməsi kimi şərtlərə əməl etmək lazımdır”. 

“Həmin qida maddəsi insan orqanizmi üçün nə qədər təhlükəli ola bilər” sualına cavab verən Ağa Salamov deyib ki, orqanizm üçün elə bir ciddi fəsadı olmadığı müəyyən edilib:

“Bu qida maddəsini siçanlarında üzərində araşdırıblar. Onlara 4-5 həftə ərzində gündə 1-3 qram yedizdiriblər. Lakin bu onlara təsir etməyib. Ümumiyyətlə təhlükəsiz əlavədir, yan təsirləri nadir halda olur. Məsələn, baş ağrı, baş gicəllənmə kimi yüngül simptomları ola bilər. Lakin bu maddənin qidalara əlavə edilməsinin tərəfdarı deyiləm. Çünki biz bilmirik ki, bu maddə istifadə olunanda doza həddini aşır, ya yox. Doza həddi aşılan hər qida maddəsi zərərli sayılır. Ona görə də düşünürəm ki, qida qatqı maddələrini mütəxəssiləri, xüsusi qida texnoloqları olan şirkətlər istifadə etməlidir. Bu dəqiqə həyatımızdakı hər bir məhsulun tərkibində qida qatqısı var. Hərəsindən bir az yeyib, üstəgəl də lavaşda da bu maddədən yeyiriksə artıq həyəca təbili çalmaq olar”. 

Ekspert qeyd edib ki,  çörəyi ev şəraitində kiflənmədən qorumaq istəyiriksə onu soyuducu tempraturunda 2-3 gün saxlaya bilərik:

“Amma mən məsləhət görərdim ki, çörək gündəlik rasiona uyğun alınsın, onu iki gün saxlamamaq şərti ilə bir günə istifadə olunsun. Sovet vaxtı yarım çörək satılırdı, amma indi satılmır. Az çörək istifadə edən də məcburdu bütün çörək alsın. Mən bunun tərəfdarı deyiləm. Həm una qənaət deyil, həm israfçılıqdır. Ona görə də paketlənmiş halda insanlara yarım çörəklər satılmalıdır”.

Davud