“Siyavuş Novruzovun fikirlərini dəstəkləyirəm. Əslində bunu iqtisadçılar deyir. Hətta hökumət də bu barədə çıxışlar edirŞ mma bununla bağlı atılacaq konkret addımlar lazımdır”.

Bunu Valyuta.az-a açıqlamasında iqtisadçı ekspert Fuad İbrahimov deputat Siyavuş Novruzovun "Banklar haqqında" qanunun müzakirəsi zamanı vətəndaşların orta və kiçik sahibkarlıqla məşğul olması üçün ala biləcəyi kreditlərin faizinin yuxarı olması ilə bağlı fikirini şərh edərkən deyib.

Ekspert bildirib ki, biznesin və yaxud da orta, kiçik sahibkarlığın inkişafı üçün konkret dəhliz, yəni xüsusi maliyyə mənbəyi açılmalıdır:

“Hazırda müxtəlif proqramlarla müəyyən olunmuş banklar vasitəsi ilə belə vəsaitlər ayrılır. Məsələn, 4%-5%-lə və s. belə layihələr mövcuddur. Ancaq bu maliyyə mənbələri məhduddur. Belə pilot layihələr müəyyən banklar vasitəsi ilə ayrılır, amma bu mütəmadi davam etməlidir”.

Fuad İbrahimov deyir ki, orta və kiçik sahibkarlığın davamlı və dayanıqlı inkişafı üçün ümumiyyətlə, 10 üzərindəki faiz yüksək hesab olunur:

“Biz rəqabət yönümlü mühit formalaşdırmaq istəyiriksə mütləq şəkildə  3-6% arasında biznes kreditlərinin ayrılması və bu mənbənin müəyyən edilməsi təmin edilməlidir. Əks təqdirdə bu faizlərlə götürülən kreditlərin geri qaytarılmasında əngəllər yaşanacaq. Eyni zamandan bu biznesin özünün də gələcəyi sual altında olacaq”.

Qeyd edək ki, "Banklar haqqında" qanunun müzakirəsi zamanı deputat Siyavuş Novruzov vətəndaşların orta və kiçik sahibkarlıqla məşğul olması üçün ala biləcəyi kreditlərin faizinin yuxarı olduğunu bildirib:

“14 faiz kreditlə vətəndaşın təsərrüfatla, yaxud bizneslə məşğul olması və bu pulun qaytarılması çox çətindir. Birinci məsələ burada bankların faiz dərəcəsinin aşağı salınması olmalıdır”.

Aylin