Bir çox bizneslər sosial şəbəkə paylaşımlarında məhsulların qiymətini yazmırlar. Alıcılar qiyməti soruşmaq üçün ya şərh yazanda, cavab olaraq qeyd edilir: “Qiymət mesaj qutunuza göndərildi”. Bizneslərin bu yanaşması çox vaxt alıcıları qıcıqlandırır. Şərhlərdə də qiymət qeyd olunmadığına görə şikayətlənirlər. Əslində, bu satıcıların xeyrinədir. Çünki paylaşıma nə qədər şərh, mesaj gəlirsə, bir o qədər də səhifənin aktivliyi yüksəlir, paylaşımlar daha çox insana çatır.

Sosial media marketinqi Mirsəid Hüsülü Valyuta.az-a soaial mediada satıcıların qiyməti qeyd etməməsinin səbəblərindən, yaranan problemlərdən danışdı. O deyir ki, sosial media mağaza olmadığından görə, burada bir çox başqa şərtlər var: 

“Postun üzərinə qiymət yazılanda, o paylaşım reklama qoyulanda, birbaşa olaraq həmin satıcının sosial şəbəkəsi bloka düşə bilər. Ona görə də, bizneslər bu məsələlərə diqqət edirlər. “Instagram” sosial şəbəkədir, mağaza deyil. Mağaza kimi istifadə etmək istəyirsizsə, müəyyən tələbləri qarşılamalısınız. Saytınız, mobil tətbiqiniz olmalıdır. “Facebook” hazırda Azərbaycan üçün “market place” (bazar yeri) açmayıb. Zamanla bu həllini tapdıqda ilk olaraq böyük mağazalar, sonradan kiçik mağazalar və online satışlar istifadə edə biləcək”.

Mirsəid bəy bildirir ki, qiymətin şərh və ya mesaj yazıldıqdan sonra göndərilməsi isə səhifənin aktivliyini artırmaq üçün metoddur: 

“Sosial mediada onlayn satışla məşğul olan səhifələr bu üsulla paylaşımlarının populyarlığını artıraraq daha çox insanın diqqətini çəkirlər. Belə hallar adətən, yeni açılan firmalar və ya yeni təkamül etmiş səhifələr üçün keçərlidir. 

Düzgün reklam verilən hər bir postun altındakı rəylər çox olur. Çox olması isə populyarlığı artırır və paylaşım daha çox insana çatır”.

Nuray