Kapital Bank müştəriyə gecikmiş ödənişə görə faiz hesablayıb. Müştəri göstərilən məbləği ödədikdən bir ay sonra ona yeni bildiriş gəlib. Bank həmin bildirişdə qeyd edib ki, sistemdəki yalnışlıq səbəbindən gecikdirilmiş borc üzrə cərimə məbləği səhv hesablanıb. Ona görə də əlavə ödəniş edilməlidir. 

Bəs belə olan halda ödənişi müştəri ödəməlidir?

Valyuta.az-a bu haqda danışan bank məsələləri üzrə ekspert Əkrəm Həsənov bildirib ki, Azərbaycanda bu hallarla bağlı təcrübə yoxdur:

"Təəssüf ki, vətəndaş məhkəmə yolu ilə bu problemi həll edə bilməyəcək. Çünki məbləğ kiçik olduğuna görə bu, zaman itkisidir".

Ekspertin fikrincə, vətəndaş bununla bağlı Mərkəzi Banka şikayət edə bilər, amma son nəticədə böyük ehtimalla mövqe ondan ibarət olacaq ki, bank düz hesablamayıb, texniki səhv edibsə, əgər sənin borcun bu məbləğdirsə, onu ödəməlisən, çünki bağladığın müqaviləyə görə öhdəlik götürmüsən:

"Lakin hesab edirəm ki, bank əvvəldən dediyi məbləği müştəri ödəyibsə, sonradan əlavə olunan məbləği bank özü ödəməlidir. Amma təəssüf ki, bizdə qaydalar belədir: Borc gecikməsinə görə müştəri bankla müqavilə bağlayıb, həmin müqavilədə razılaşıb ki, əgər gecikməyə yol versə, əlavə ödəniş etməyə razıdır. Bir misal deyim, İngiltərədə məhkəmə təcrübəsi başqa cürdür. Orda düşünülür ki, bank peşəkardır, sahibkardır, müştəri isə vətəndaşdır. Əgər sən peşəkar kimi müştərinə məlumat verdinsə, məsələ bitdi. Sən ilk dəfə hansı məlumatı vermisənsə, əsas məlumat odur. İngiltərə qanunvericiliyə görə, bank hansısa müştərisinin hesabına səhvən pul qoyursa, müştəri o pulu xərcləyirsə, bu halda məhkəmələrin mövqeyi ondan ibarətdir ki, bankın qoyduğu pul, müştərinin hesabındakı puldan ciddi fərqlənmirsə, vətəndaş o pulu xərcləyirsə, bankı günahkar hesab edir və pul batır. Lakin fərq böyükdürsə, vətəndaş o pulu qaytarmalı olur”.

Davud