Bəzən bank əməkdaşları bankların xəbəri olub-olmamasından asılı olmayaraq bank sirrini pozaraq müştərinin şəxsi məlumatlarını, bankda olan əməliyyatlar haqqında müfəssəl məlumatları kənar şəxslərə ötürür. Bu isə vətəndaşlara həm maddi, həm də mənəvi ziyan vurur. 

Bəs bu halla qarşılaşan bank müştəriləri nə etməlidir? Qanun nə deyir? 

Valyuta.az məsələni bank məsələləri üzrə ekspert, hüquqşünas Əkrəm Həsənovla müzakirə edib. 

Əkrəm Həsənov deyib ki, belə problemlə qarşılaşan müştəri öncə Mərkəzi Banka və İqtisadiyyat nazirliyi yanında Antiinhisar və İstehlakçıların Hüququqlarını Müdafiəsi Dövlət Xidmətinə şikayət edə bilər:

“Amma bu qurumlar bankı cərimələyə bilər. Vətəndaşa dəyən zərərin ödənilməsinə nail ola bilməz",

Hüquqşünas bildirib ki, vətəndaşa dəyən ziyanın ödənilməsi üçün məhkəmədə iddia qaldırıla bilər:

“Belə olanda isə vətəndaş ona dəyən maddi ziyanı sübut etməlidir. O maddi itkisinin nə olduğunu, bundan kimin istifadə edərək ona vurduğu ziyanı sübut etməlidir. Mənəvi ziyanı isə tələb edə bilər və təcrübədə də belə işlər var. Məhkəmələr bankları vətəndaşa vurduğu mənəvi zərərə görə müxtəlif miqdarda, məsələn, 300, 500, 1000 manat cərimələyib".

Davud