Sosial Tədqiqatlar Mərkəzində müaliyyə-bank sistemi və vətəndaşlarımızın mənafelərinin birgə qorunmasına həsr olunan toplantıda qurumun rəhbəri Zahid Oruc maraqlı təkliflərlə çıxış edib. O bildirib ki, 44 günlük Xilas və Qurtuluş hərəkatı kimi, bütün sferalarda, təhsildən səhiyyəyə 44 günlük dönüş proqramları yeni dövlət siyasətinin əsasını təşkil edə bilər. Həmçinin əlavə olaraq vurğulayıb ki, problemli kreditlərin 44 günə silinməsi yollarının tapılması Qarabağda böyük quruculuq işlərinə də töhfə olardı. 

Valyuta.az-a açıqlamasında iqtisadçı ekspert Natiq Cəfərli bildirir ki, kredit tarixçəsi yaxşı olan müştərilərə digərlərilə müqayisədə kreditlər daha aşağı faizlərlə verilməlidir:
 
“Müəyyən problemləri qısa müddət ərzində həll etmək olar. Problemli kreditlərin dövlət tərəfindən silinməsi baş verib. Əvvəllər 2 milyard manata yaxın olan problemli kreditlərin həcmi indi 590 milyon manata qədərdir. Bu fonda problemli kreditlərin 44 günə silinməsi də mümkündür. Amma hər dəfə bu praktikadan istifadə etmək o qədər də doğru yanaşma deyil. Əksinə, krediti vaxtında ödəyənlər üçün ciddi güzəşt proqramları olmalıdır. Kredit tarixçəsi yaxşı olan müştərilər digərlərinə nisbətən 4-6 faiz daha aşağı faizlə kredit almalıdır. 

Zahid Orucun problemli kreditlərin 44 günə silinməsinin Qarabağda böyük quruculuq işlərinə müsbət təsir edəcəyilə bağlı açıqlamasına gəlincə, bununla o, siyasi, iqtisadi, bank, təhsil, səhiyyə və s. sektorlarda yeni sistem düzənləməsilə işlərə yenidən başlamaq arzusunu dilə gətirib. Həqiqətən də yeni idarəetmə sistemi, yeni iqtisadi model olmaldıır. Bu mənada işğaldan azad olunmuş xam torpaqların, sonradan bütün ölkə üzrə örnəyə çevrilməsi üçün,  təməlini daha sağlam qoymaq mümkündür”.

Ramiz