Azərbaycanda ən iri pul vahidi hələlik 200 manatlıq əskinaslardır. Amam bununla belə son zamanlar 500 manatlıq əskinasların buraxılmasını təklif edənlər də var. Görəsən, mövcud vəziyyətdə daha böyük əskinazların dövriyyəyə buraxılmasına ehtiyac var, ya yox?

Valyuta.az-a açıqlama verən iqtisadçı ekspert Fuad İbrahimov iqtisadiyyatı sağlam olmayan ölkə üçün 500 manatlıq əskinasların dövriyyəyə buraxılmasının yolverilməz olduğunu qənaətindədir:

“Azərbaycanda ən yüksək pul vahidi 200 manatlıqdır. ABŞ-da ən yüksək pul vahidi 100 dollar, Avrozonada isə 500 avrodur. İqtisadiyyatın sağlam olması, vətəndaşların nəğdsiz ödəniş sisteminə vərdiş etməsi, gizli iqtisadiyyatın tamamilə aradan qaldırılması fonunda əskinasların hər hansı bir nominal dəyərdə olmasının elə bir ciddi təsiri yoxdur. Amma gizli iqtisadiyyatın güclü olduğu, büdcə vəsaitlərin təyinatı üzrə istifadə olunmaması praktikada geniş yayılıbsa, bu halda daha iri əskinazların dövriyyəyə buraxılması məqsədəuyğun deyil. 

İqtisadiyyatımız sağlam olsa, hətta min manatlıq əskinasları da buraxmaq olar. Amma Azərbaycandakı mövcud vəziyyət 500, 1000 manatlıq əskinaslardan uzaq durmağımızı tələb edir. Həmin əskinasları indiki halda dövriyyəyə buraxsaq, gizli iqtisadiyyata, büdcə vəsaitlərinin təyinatdan kənar istifadəsinə şərait yaratmış olacağıq”.

Ramiz