Milli Məclisin bu gün keçirilən iclasında “Azərbaycan Respublikasının Mərkəzi Bankı haqqında” qanuna təklif edilən dəyişikliklərin müzakirəsi zamanı Mərkəzi Bankın sədri Taleh Kazımov deyib ki, Azərbaycanda inflyasiya hədəfi 4 faizdir. O qeyd edib ki, çox aşağı inflyasiya iqtisadi inkişafa mane olur.

“İnflyasiya olmalıdır ki, iqtisadiyyat inkişaf etsin. İnflyasiyanın olmaması da iqtisadiyyat üçün pisdir. Bizim inflyasiya hədəfimiz 4 faizdir”, deyə ABM sədri əlavə edib.

Valyuta.az-a açıqlamasında “Liberal İqtisadçılar” Mərkəzinin rəhbəri Akif Nəsirli bildirib ki, baş bankirin götürdüyü bu hədəf normaldır, amma bununla belə populist hədəfdir:

“İnkişaf etmiş ölkələrdə inflyasiya hədəfi olaraq aşağı-yuxarı 1-3 faizlik norma nəzərdə tutulur. ABŞ-da inflyasiya 3 faizdən çox olanda nəyinsə düz getmədiyi qənaətinə gəlməklə tədqiqatçılar dərhal onun səbəbini arışdırmağa başlayır. Azərbaycanda keçən ilin yekunlarına görə, rəsmi inflyasiya 14,3 faiz olub. Reallıqda isə bundan iki dəfə çoxdur. Belə bir şəraitdə isə 4 faizlik inflyasiya hədəfinin götürülməsi hökumət üçün normaldır. Amma məsələ ondadır ki, 4 faizlik hədəf götürüb, ilin sonunda inflyasiyanın 15 faiz civarında olduğunu elan eləyəcəklərsə, bu normal hal deyil. Onda ya prosesi düzgün qiymətləndirə bilmirik, ya da imkanlarımızdan daha yuxarı proqnozlar veririk”. 

Ramiz