“Sağlam at əti zərərli deyil. Amma at xəstə olub ölübsə, onda olan xəstəlik həmin əti yeyən insanlara keçəcək. Eləcə də iri buynuzlu mal-qara xəstəlikdən ölürsə, onun ətidən istifadə etmək olmaz”.

Bunu Valyuta.az-a açıqlamasında iqtisadçı ekspert Vahid Məhərrəmov Cəlilabadda 2 tondan artıq ölü at ətini mal əti adı altında satışının aşkarlanmasına münasibət bildirərkən deyib. Ekspert ölü heyvanların ətinin bazara çıxarılması hallarının çoxalması qeyd edib:

“Azərbaycan özünün ətə olan təlabatını kifayət qədər ödəyəcək həcmdə deyil. Digər ölkələrdən gətirilən diri heyvanların sayı, ət idxalı da kəskin şəkildə artıb. Azərbaycanda 60 minə yaxın at, 20 mindən çox da eşşək var. Bu heyvanların il ərzində hardasa 10-15 minə yaxını cıxdaş olur. Həmin heyvanların arasında xəstə, ölən, şikəst, itifadəyə yararsız olanları da olur. Uzun illərdir ki, leş əti satanların qarşısı alınmadı. Yalnız at, eşşək deyil, hətta xəstələnib ölən mal-qara əti də var. Xəstəlikdən ölən heyvanı dərhal kəsirlər və hər hansı formada bazara çıxarırlar. Nəzarət də yoxdur. Ölən heyvanın əti bazara çıxarılıbsa, onun mütləq baytar həkimdən arayışı olmalıdır. Bu məsələyə görə baytar həkim məsuliyyət daşıyır”.

Vahid Məhərrəmov bütün heyvanların sənədləşməsinin aparılmağının vacibliyini vurğulayıb:

“At, eşşək ölən kimi sahibkar yerli baytar idarəsinə müraciət etməli, onun ölümü ilə bağlı məlumat verməlidir. Onlar da sahibkara atın, eşşəyin ölümü ilə bağlı arayış verməlidir ki, həmin at bazara çıxarılmayıb. Təəssüflər olsun ki, bu sahədə rüşvətxorluq aradan qaldırılmayıb. Sahibkar ola bilsin ki, baytar həkimə rüşvət verib saxta arayış alır və mal əti adı altında at ətini sata bilir".

Qeyd edək ki, Daxili İşlər Nazirliyi Qida Təhlükəsizliyi Agentliyi ilə birgə vətəndaşların ərzaq təhlükəsizliyinin təmin edilməsi istiqamətində növbəti əməliyyat tədbiri həyata keçirib. Tədbir zamanı Cəlilabad rayonunda qidaya yararsız və ölü at ətinin mal əti adı altında satışını təşkil edən Səbuhi Abbasov saxlanılıb. 

Daxili İşlər Nazirliyi və Qida Təhlükəsizliyi Agentliyinin əməkdaşları tərəfindən Səbuhi Abbasovun Cəlilabad rayonunun Maşlıq kəndində yerləşən həyətyanı sahəsinə və saxlanc yerinə baxış keçirilərkən qidaya yararsız 2 tondan çox at əti maddi sübut kimi götürülüb.

Aylin