Dünya Bankının (DB) "Dünya iqtisadiyyatının inkişaf perspektivləri” adlı iyun hesabatında Azərbaycanın 2023-cü il üçün ÜDM-nin artım tempi 2,2 faiz səviyyəsində proqnozlaşdırılır. Bu isə yanvardakı gözləntilərdən 0,6 faiz bənd aşağıdır.

DB-nin hesabatına əsasən, 2024-cü ildə Azərbaycanda ÜDM artımı 2,5 faiz, 2025-ci ildə isə 2,6 faiz təşkil edəcək.

Xatırladaq ki, 2022-ci ildə Azərbaycanda ÜDM artımı 4,6 faiz təşkil edib, o cümlədən qeyri-neft sektoru 9,1 faiz artıb.

Liberal İqtisadçılar Mərkəzinin sədri Akif Nəsirli Valyuta.az-a açıqlamasında bildirib ki, DB-nin Azərbaycanla bağlı proqnozunun özünü doğrultması ehtimalı çox aşağıdır:

“Dünya Bankının bu istiqamətdə verdiyi açıqlamaları adətən hansısa perspektiv və planlara əsaslanır. Azərbaycan kimi inkişafda olan ölkələrdə ÜDM-də 2,5-3 faizlik artım ölkə iqtisadiyyatı üçün elə də ciddi artım tempi sayıla bilməz. Azərbaycan kimi ölkələrdə ÜDM-nin normal artım tempi 5-6 faizin üzərində olmalıdır. Hətta ola bilsin, DB-nin Azərbaycanla bağlı proqnozu özünü doğrultmasın. Çünki Azərbaycanda istehlak malları bölməsi üzrə idxal prosesi ildən-ilə artır. Hər il istehlak mallarının idxalında 15-20 faiz civarında artım müşahidə olunur. Gələcəkdə də bu temp bir qədər də artacaq. Bu mənada DB-nin verdiyi proqnozlarını doğrulda bilməyəcəyimizdən ehtiyyat edirəm”.

Ramiz