"Prezident təqaüdünə layiq görülən tələbələr onu sona kimi qorumaq üçün yaxşı oxumalıdır".

Bunu Qaynarinfo-ya açıqlamasında təhsil eksperti Kamran Əsədov Prezident İlham Əliyevin Azərbaycanda ali məktəblərin tələbələri üçün Prezident təqaüdünün məbləğinin artırılması ilə bağlı fərmanını şərh edərkən deyib. Kamran Əsədov bildirib ki, Prezident təqaüdünün verilməsinə 2001-ci ildən başlanılıb:

“Bu ali təhsil müəssisələrində keçirilən qəbul imtahanlarında hər qrup üzrə 25 tələbəyə verilir. Kifayət qədər yaxşı bir məbləğdir. Axırıncı dəfə Prezident təqaüdü tələbələr üçün 2019-cu ildə artırılıb və 210 manat müəyyənləşdirilmişdi. İndi məbləğ 250 manata çatdırıldı. Bu, tələbələr arasında kifayət qədər rəqabət yaradacaq. Amma bir vacib məqamı xüsusi qeyd edim ki, tələbələr Prezident təqaüdünə layiq görülsələr də, onu 4 il ərzində saxlamırlar. Prezident təqaüdünü 4-cü kursun sonuna kimi alması üçün tələbənin bütün qiymətləri əla olmalıdır”.

Kamran Əsədov hesab edir ki, tələbənin bu göstəricini saxlaması üçün mütləq şəkildə təhsil aldığı müddətdə akademik göstəriciləri müsbət olmalıdır:

“Amma bəzi hallarda ali təhsil müəssisələri Prezident təqaüdü alanlara aşağı qiymət yazırlar və tələbələr bunu sona kimi apara bilmir. Prezident təqaüdü almaq tələbələrə geniş imkanlar açır. Onunla yanaşı digər əlaçı təqaüdləri də ala bilər. Məsələn, bir tələbə istəsə, 600 manata kimi təqaüd ala bilər. 250 Prezident təqaüdü, 150 manat əlac təqaüdü, digər adlı təqaüdlər və s.”.

Qeyd edək ki, Prezident İlham Əliyevin fevralın 14-də Azərbaycanda ali məktəblərin tələbələri üçün Prezident təqaüdünün məbləğinin artırılması ilə bağlı fərman imzalayıb. Fərmanla ali məktəblərin tələbələri üçün Prezident təqaüdünün məbləği 210 manatdan 250 manata çatdırılıb.