Çin mərkəzli e-ticarət nəhəngi "Alibaba" cümə günü ABŞ-da səhmdarları tərəfindən qaldırılan məhkəmə iddiasını həll etmək üçün 433,5 milyon dollar ödəməyə razılaşdığını açıqlayıb. 

Valyuta.Az "Reuters"ə istinadla xəbər verir ki, bu iddia şirkətin inhisarçılıqda ittiham olunması ilə bağlıdır. "Alibaba", hər hansı qanunsuz fəaliyyətə yol vermədiyini bildirib və məhkəmə proseslərinin xərclərini və yaratdığı narahatlıqları azaltmaq məqsədilə bu həll yoluna üstünlük verdiyini qeyd edib. Təklif olunan bu məhkəmə razılaşması Manhetten federal məhkəməsinə təqdim edilib və ABŞ Rayon Hakimi Corc Danielsin təsdiqini gözləyir.

İlk olaraq 2020-ci ildə verilən iddia "Alibaba"-nın inhisar və ədalətsiz rəqabət qanunlarını pozmadığını iddia etdiyini, lakin şirkətin satıcılardan yalnız bir satış platformasını seçməsini tələb etdiyini bildirir.

Razılaşma 13 noyabr 2019 - 23 dekabr 2020 tarixləri arasında "Alibaba"-nın ABŞ-da depozitar səhmlərinə sahib olan investorlarını əhatə edir. Bu dövrdə "Alibaba"-nın bəzi qərar və açıqlamaları üzündən səhmlərin qiymətində kəskin düşüş yaşanmış və səhmdarlar maliyyə itkiləri ilə üzləşmişdilər.

İddiaçıların vəkilləri təklif olunan bu razılaşmanı “mükəmməl nəticə” adlandırıblar və onun investorların itkiləri 10 milyard dolları aşan digər oxşar işlərdə əldə edilən orta nəticələri çox üstələdiyini bildiriblər. Vəkillər, bu iş üzrə investorların davam etməsi halında tələb edə biləcəkləri maksimum məbləğin 11,63 milyard dollar olduğunu vurğulayıblar.

Aydın