İkitərəfli münasibətlərdəki mövcud çətinliklərə baxmayaraq, Tokio ərazi probleminin həllinə və Rusiya ilə sülh müqaviləsi bağlamaq kursuna sadiqdir.

Yaponiya hökumətinin başçısı Şiqeru İşiba bu barədə parlamentdə çıxışı zamanı deyib.

“Yaponiya-Rusiya münasibətləri çətin dövrünü yaşayır, lakin ölkəmiz ərazi probleminin həlli və sülh müqaviləsinin bağlanması istiqamətində kursunu davam etdirəcək”, - deyə Şiqeru İşiba bildirib.

Ötən əsrin ortalarından bəri Moskva və Tokio II Dünya müharibəsindən sonra sülh sazişinin hazırlanması üçün danışıqlar aparır. Bunun üçün əsas maneə Kuril adalarının cənub hissəsi ilə bağlı fikir ayrılıqlarıdır. Müharibədən sonra bütün arxipelaq Sovet İttifaqının tərkibinə qatılsa da, Yaponiya İturup, Kunaşir, Şikotan və bir qrup kiçik məskunlaşmamış adalara iddia edir. Rusiya Xarici İşlər Nazirliyi isə bu ərazilər üzərində Rusiyanın müvafiq beynəlxalq hüquqi bazaya malik suverenliyinin şübhə doğurmadığını dəfələrlə vurğulayıb.

Xatırladaq ki, Ukraynadakı münaqişə ilə bağlı Yaponiyanın Rusiya əleyhinə tətbiq etdiyi sanksiyalardan sonra Moskva sülh müqaviləsi məsələsində Tokio ilə məsləhətləşmələri dayandırıb.

©modern.az