Çin, Tayvana silah satışına görə ABŞ-ın 13 hərbi şirkətinə qarşı sanksiya tətbiq edilməsi barədə qərar qəbul edib.

Valyuta.Az "Bloomberg"ə istinadən xəbər verir ki, Çin Xarici İşlər Nazirliyi cümə axşamı bəyan edib ki, ABŞ-ın Tayvana silah satışı ölkənin suverenliyinə və ərazi bütövlüyünə zərbə vurduğu üçün bu addım atılıb. Qərar ABŞ-ın Tayvana F-16 təyyarələri və radarlar üçün ehtiyat hissələri də daxil olmaqla, 385 milyon dollarlıq satış razılaşmasına qarşı Çinin ciddi etirazından sonra verilib.

Çin Tayvanı öz ərazisi hesab edir və adanın prezidenti Lay Çing-tini (Lai Ching-te) ayrılma tərəfdarı kimi qəbul edir. Çin, Tayvanın liderlərinin xarici dövlətlərlə hər hansı təmaslarına və ya səfərlərinə kəskin şəkildə qarşı çıxır.

Nazirliyin açıqlamasında qeyd olunub ki, sanksiyalara məruz qalan şirkətlər arasında "Teledyne Brown Engineering Inc", "BRINC Drones Inc" və "Shield AI Inc" kimi tanınmış adlar yer alır.

Siyahıda həmçinin aşağıdakı şirkətlər də var:  

► "Rapid Flight LLC"
► "Red Six Solutions"
► "SYNEXXUS Inc"
► "Firestorm Labs Inc"
► "Kratos Unmanned Aerial Systems Inc"
► "HavocAI"  
► "Neros Technologies"
► "Cyberlux Corporation" 
► "Domo Tactical Communications"
► "Group W."

Bununla yanaşı, Çin "Raytheon", "BAE Systems" və "United Technologies" şirkətlərinin altı rəhbərinin ölkədəki aktivlərini donduracaq və onların Çinə girişini qadağan edəcək.

Çinin qərarına əsasən, yerli şirkətlərə və fərdlərə adıçəkilən şirkətlər və şəxslərlə işgüzar əlaqələr qurmaq da qadağan olunub.

Rəhim