Cümə axşamı günü Almaniyanın inflyasiya göstəriciləri və Fransanın büdcə problemləri Avropa bazarlarında əsas müzakirə mövzularıdır. 

Sərmayəçilər, regional güc mərkəzlərinin iqtisadi və siyasi sabitliyinə dair narahatlıqlarını davam etdirirlər. Bununla yanaşı, ABŞ-ın tarif siyasətinin Avropa iqtisadiyyatına təsiri gündəmdən düşmür.  

Bu barədə Valyuta.Az "Reuters"ə istinadən xəbər verir.

ABŞ bazarlarının Şükran Günü münasibətilə bağlı olması səbəbindən Asiyada ticarət aktivliyi zəif qalıb. Buna baxmayaraq, Avropa birjalarının günə azca artımla başlaması gözlənilir.  

Fransanın bazarlarında vəziyyət xüsusilə diqqət çəkir. Çərşənbə günü ölkənin əsas birja indeksi avqustdan bəri ən aşağı səviyyəyə düşüb. Bunun səbəbi büdcə məsələlərində yaranan gərginliyin hökumət üçün təhdid yaratmasıdır.  

Fransanın istiqrazlarının dəyəri də əhəmiyyətli şəkildə azalıb. Bu, ölkənin borclanma faizlərinin 2012-ci il avrozonanın borc böhranından bəri ən yüksək səviyyəyə qalxmasına gətirib çıxarıb.  

Sağçı lider Marin Lö Pen (Marine Le Pen), baş nazir Mişel Barnyenin (Michel Barnier) rəhbərlik etdiyi koalisiya hökumətini büdcə ilə bağlı fikir ayrılığı səbəbindən etimadsızlıq səsverməsi ilə devirmək hədəsi ilə çıxış edib. Mübahisəli büdcə layihəsi xərclərin azaldılmasını və vergilərin artırılmasını nəzərdə tutur.  

Almaniyada isə siyasi qeyri-müəyyənlik iqtisadi göstəricilərlə üst-üstə düşür. Ayın əvvəlində hökumət koalisiyasının dağılması nəticəsində fevral ayında növbədənkənar seçkilərin keçirilməsi gözlənilir. Hazırda diqqət noyabr ayının ilkin inflyasiya məlumatlarına yönəlib.  

Oktyabrda inflyasiya göstəriciləri illik 2.4% səviyyəsində artmışdı, noyabrda isə bu rəqəmin 2.6% olacağı proqnozlaşdırılır. Bu məlumatlar Avropa İttifaqı ölkələri ilə müqayisə üçün uyğunlaşdırılmış göstəricilər əsasında təqdim edilir.  

Bununla yanaşı, çərşənbə günü yayımlanan sorğu Almaniya iqtisadiyyatında əlavə problemlərin olduğunu göstərir. İstehlakçıların əhval-ruhiyyəsi ilin son ayında daha da pisləşib, çünki iş yerlərinin ixtisarı ilə bağlı xəbərlər ev təsərrüfatlarında pessimizm yaradıb.  

Almaniya hökuməti 2024-cü il üçün 0.2% iqtisadi geriləmə proqnozlaşdırır. Bu isə ölkənin ardıcıl ikinci dəfə azalma yaşayacağı deməkdir. Almaniya, böyük avrozona iqtisadiyyatları arasında ən zəif performans göstərən ölkə olaraq qalmaqdadır.  

Fransa və Almaniya iqtisadiyyatlarındakı gərginlik sərmayəçiləri sual etməyə vadar edir: Avropanın yeni "xəstə adamı" kimdir?  

Cümə axşamı bazarlara təsir edə biləcək əsas hadisələr:  

- Avrozona üzrə istehlakçı etimadı və əhval-ruhiyyə sorğuları (noyabr).  
- Almaniyanın noyabr ayı üzrə ilkin inflyasiya hesabatı.  

Aydın