İndoneziya bəzi bizneslərin dövlət banklarından götürdükləri kreditlərin tam bağışlanması üçün altı ay müddətinə, 2025-ci ilin may ayınadək davam edəcək yeni bir proqram elan edib. 

Valyuta.Az-ın verdiyi xəbərə görə, bu siyasət ölkədə kreditləşməni və iqtisadi artımı canlandırmağı hədəfləyir.

Ötən həftə İndoneziya Prezidenti Prabovo Subianto, dövlət banklarının müəyyən mikro, kiçik və orta biznes subyektlərinin (KOB) zərərli kreditlərini tamamilə silməsinə imkan verən hökumət qərarını təsdiqlədi. Bu KOB-lar ölkənin ümumi daxili məhsuluna əhəmiyyətli töhfə verir və iqtisadi inkişaf üçün mühüm hesab edilir.

Prabovo, yeni siyasətin əsasən kənd təsərrüfatı və balıqçılıq sahəsində çalışan, qida istehsalında önəmli rol oynayan KOB-ları dəstəkləyəcəyini vurğulayıb. O bildirib ki, bu addım həmin biznes sahiblərinə öz fəaliyyətlərini davam etdirmək və ölkə üçün daha faydalı olmaq imkanı verəcək.

Hazırda prezidentlik müddətini 2029-cu ilə qədər davam etdirən Prabovo, İndoneziyanın illik iqtisadi artımını 3 faiz artıraraq 8%-ə çatdırmaq niyyətindədir və bu məqsədlə qida istehsalının artırılmasını prioritet sahə kimi görür.

Yeni siyasətə əsasən, borcu 500 milyon rupiyə qədər (təxminən 31,887.76 dollar) olan və kreditləri ən azı beş il əvvəl banklar tərəfindən dondurulmuş KOB-lar bu güzəştdən faydalana biləcəklər. Beləliklə, bu KOB-lar köhnə borclarına görə yeni maliyyə dəstəyi ala bilmədikləri halda, artıq yeni kreditlər üçün müraciət edə biləcəklər.

Mikro və kiçik biznes kreditləri üzrə ixtisaslaşmış dövlət bankı "Rakyat Indonesia" (BRI), yeni siyasətin onlara yeni kredit imkanları yaradacağını bəyan edib. Bank "Mandiri" isə bu siyasətin maliyyə göstəricilərinə təsir etməyəcəyini açıqlayıb.

Yeni nizamnamə həmçinin dövlət bankları və onların idarə heyəti üzvlərini zərərli kreditlərin silinməsi zamanı dövlət itkilərinə səbəb olmaq ittihamlarından qoruyur. Beləliklə, qanun bu prosesdə onları məsuliyyətdən azad edir.

Aydın