ABŞ-da Respublikaçılar Partiyasının prezidentliyə namizədi Donald Tramp, ABŞ Mərkəzi Bankının (Fed) faiz dərəcələrini 50 baza bəndi üzrə azaltma qərarını "siyasi addım" adlandırıb.

Valyuta.Az-ın verdiyi xəbərə görə, Donald Tramp mövzu ilə bağlı fikirlərini bildirərkən, "Bu, həqiqətən də siyasi bir addımdır. Əksər insanlar bunun yarısı qədər azalma gözləyirdilər, yəqin ki, ən düzgün qərar da bu olardı" deyib.

Qeyd edək ki, Tramp, ABŞ prezidentlərinin FED üzərində təsir sahibi olmalı olduğunu düşünür. Belə ki, o, keçən ay mövzu ilə bağlı verdiyi açıqlamada ABŞ prezidentlərinin ABŞ Mərkəzi Bankı tərəfindən verilən qərarlar üzərində söz sahibi olmalı olduğunu iddia etmişdi.

Fed-in qərarları, dünyanın ən böyük iqtisadiyyatı olan ABŞ və qlobal iqtisadiyyat üzərində mühüm təsirə malikdir. Bank öz qərarlarında böyük ölçüdə müstəqil olsa da, Fed sədri və idarə heyətinin digər altı üzvü ABŞ prezidenti tərəfindən namizəd göstərilir. Son qərarı isə ABŞ Senatı verir.