Avropa Avtomobil İstehsalçıları Assosiasiyasının (ACEA) bildirdiyinə görə, avqustda Avropa İttifaqında avtomobil satışları illik müqayisədə 18,3% azalıb və bütün əsas Avropa avtomobil bazarlarında satışlarda azalma qeydə alınıb.

Valyuta.az bu barədə "İnterfax"a istinadən xəbər verir.

Ötən ay Aİ-də ümumilikdə 643,6 min avtomobil satılıb. Almaniyada satışlar 27,8%, Fransada 24,3%, İtaliyada 13,4%, İspaniyada 6,5% azalıb. Bütövlükdə Avropada satılan yeni avtomobillərin sayı (Aİ ölkələri üstəgəl İslandiya, Norveç, İsveçrə və Böyük Britaniya) ötən ay 16,5% azalaraq 755,7 min ədəd olub.

Avropa İttifaqında elektromobillərin satışı 43,9% azalaraq 92,6 min ədəd təşkil edib, o cümlədən Almaniyada elektriklə işləyən avtomobillərin satışı 68,8% azalıb. Aİ bazarında elektriklə işləyən avtomobillərin ümumi satışdakı payı bir il əvvəlki 21%-dən 14,4%-ə düşüb.

Avqustda Aİ-də "Volkswagen" qrupunun (o cümlədən "Skoda", "Audi", "Seat", "Porsche" və s.) satışları 14,8%, "Stellantis" (birləşmiş "Fiat Chrysler" və "PSA Group") 29,5%, "Renault 13,9% azalıb.

Alman lüks avtomobil istehsalçısı "Bayerische Motoren Werke AG"nin satışları 15,6%, rəqib Mercedes-Benz 12,7%, Cənubi Koreyanın "Hyundai Group" şirkəti satışlarını 14,5%, Yaponiyanın “Toyota Group”u isə 4,3% azaldıb.

Amerikanın elektrikli avtomobil istehsalçısı "Tesla" ötən ay Avropa İttifaqında 15,5 min avtomobil satıb ki, bu da keçən ilin avqust ayı ilə müqayisədə demək olar ki, bir yarım dəfə azdır.

Bütün məşhur avtomobil markaları arasında "Skoda" Avropada satışlarında cüzi artım (illik 0,2%), Yaponiyanın lüks brendi "Lexus" və İsveçin "Volvo" avtomobilləri tərəfindən əhəmiyyətli artım (təxminən dörddə bir) qeydə alınıb.

Bu ilin səkkiz ayında Aİ-də avtomobil satışı 1,4% artaraq, demək olar ki, 7,2 milyon təşkil edib, o cümlədən İspaniyada bu rəqəm 4,5%, İtaliyada 3,8% artıb, Fransa və Almaniyada isə müvafiq olaraq 0,5% və 0,3% azalma müşahidə olunub. 

Yanvar-avqust aylarında Avropa İttifaqında elektriklə işləyən avtomobillərin satışı 8,3% azalaraq 902 min ədəd olub.

Paşa Məmmədli