Çinin ticarət naziri Vanq Ventao Romada İtaliyanın iqtisadi inkişaf naziri Adolfo Urso ilə görüşdə bildirib ki, Avropa İttifaqının Çin elektrik avtomobil istehsalçılarına qarşı apardığı araşdırma Çin şirkətlərinin İtaliyaya investisiya planlarına ciddi təsir edir.

Valyuta.az xəbər verir ki, bu barədə Çin Xalq Respublikasının ticarət departamenti məlumat yayıb.

"Çin iki ölkənin avtomobil şirkətləri arasında qarşılıqlı investisiyaları təşviq etməyə hazırdır. Bununla belə, Aİ-nin Çinin elektrik avtomobilləri ilə bağlı araşdırması Çin avtomobil istehsalçılarının İtaliyaya sərmayə yatırmaq inamına ciddi təsir göstərib", deyə Vanq bildirib.

Nazir ümid etdiyini bildirib ki, Avropa Komissiyası bütün tərəflərin müraciətlərinə cavab verəcək və Çinlə iqtisadi və ticarət fikir ayrılıqlarını dialoq və məsləhətləşmələr yolu ilə həll edəcək.

İtaliyalı nazir də öz növbəsində Çinin ölkəsinin mühüm iqtisadi və ticarət tərəfdaşı olaraq qaldığını, Çin Xalq Respublikası ilə əlaqələrin inkişafının İtaliya üçün strateji seçim olduğunu qeyd edib.

"İtaliyanın Çinlə iqtisadi və ticarət mübadilələrini genişləndirmək arzusu var və hər iki ölkənin kiçik və orta müəssisələri arasında əməli əməkdaşlığı dəstəkləməyə hazırdır. İtaliya Avropa və Çin arasında bütün tərəflərin mənafeyinə zərər verəcək ticarət mübahisələrinin genişlənməsini istəmir", deyə Urso bildirib.

Vanq Ventao əlavə tariflərə dair səsvermə ərəfəsində Aİ-nin Çin istehsalı olan elektrik avtomobillərinə qarşı subsidiyaya qarşı işini müzakirə etmək üçün Avropaya səfər edir. Onun cümə axşamı Avropa Komissiyasının icraçı vitse-prezidenti və ticarət komissarı Valdis Dombrovskis ilə görüşü planlaşdırılır.

Paşa Məmmədli