Almaniyanın xarici işlər naziri Annalena Berbok qışda Ukraynaya 100 milyon avro ayrılacağını açıqlayıb. 

Valyuta.az xəbər verir ki, bu barədə "Reuters" məlumat yayıb.

Berbok Kiyevi dəstəkləmək üçün yeni vəsaitin ayrılmasını Rusiyanın ukraynalıların həyatını dözülməz və mümkün qədər dəhşətli etmək üçün enerji infrastrukturuna qış silsiləsi hücumları planlaşdırması ilə izah edib.

Sentyabrın 11-də ABŞ dövlət katibi Entoni Blinken Kiyevə səfəri zamanı bildirib ki, Vaşinqton Ukraynaya dəstək üçün əlavə 700 milyon dollar ayırır. Onun sözlərinə görə, Ukraynanın enerji infrastrukturunun bərpasına 325 milyon dollar xərclənəcək. Daha 290 milyon dollar isə Ukrayna əhalisinə humanitar yardım üçün ayrılacaq.

Həmin gün Böyük Britaniyanın xarici işlər naziri David Lammi Ukraynaya dəstək üçün 600 milyon funt-sterlinq (782 milyon dollar) ayrıldığını açıqlayıb.

Rusiya silahlı qüvvələri 2022-ci ilin oktyabrında Krım körpüsündə baş verən partlayışdan az sonra Ukrayna infrastrukturuna zərbələr endirməyə başlayıb. O vaxtdan bəri Ukraynanın müxtəlif bölgələrində, tez-tez ölkə daxilində hava hücumu xəbərdarlığı mütəmadi olaraq elan edilir.

Paşa Məmmədli