Finlandiyanın müdafiə naziri Antti Hakkanen Rusiya, Ukrayna və İsveçrə vətəndaşlarına aid daşınmaz əmlak əməliyyatları ilə bağlı altı mənfi qərar imzalayıb. 

Valyuta.az xəbər verir ki, bu barədə Müdafiə Nazirliyinin press-relizində deyilir.

Mənfi qərarlar Mikkeli, İmatra və Kouvoladakı mülklərə, həmçinin Lieksadakı üç mülkə aiddir.

Müdafiə Nazirliyi öz qərarlarını xüsusilə onunla əsaslandırır ki, daşınmaz əmlakla bağlı əməliyyatların milli təhlükəsizliyə təhdid yarada biləcəyi, dövlətin müdafiəsinin təşkilinə və ya ərazi bütövlüyünün qorunmasına mane ola biləcəyini istisna etmək olmaz.

Finlandiyada bir neçə ildir ki, rusiyalılar və Avropanın ümumi iqtisadi məkanına daxil olmayan digər ölkələrin nümayəndələri üçün məhdudiyyətlər qüvvədədir. 2023-cü ilin əvvəlində pulun mənşəyini və daşınmaz əmlakla bağlı əməliyyatların maliyyələşdirilməsini araşdırmaq üçün Respublika Müdafiə Nazirliyinə daha geniş səlahiyyətlər verilib və dövlətə hərbi və ya sərhəd xidməti obyektlərindən 1 kilometrdən az radiusda yerləşən daşınmaz əmlakın alınmasından ilkin imtina hüququ verilib.

Sentyabrın 2-də Finlandiyanın Müdafiə Nazirliyi Aİ-nin başqa ölkənin ərazi bütövlüyünü, suverenliyini və müstəqilliyini pozan ölkə kimi tanıdığı dövlətlərin vətəndaşları, o cümlədən rusiyalılar üçün daşınmaz əmlakla bağlı əməliyyatları qadağan edən qanun layihəsinin mətnini təqdim edib. Qanun layihəsinin bu il parlamentə təqdim ediləcəyi gözlənilir.

Mayın 23-də Rusiya Xarici İşlər Nazirliyinin rəsmi nümayəndəsi Mariya Zaxarova qeyd edib ki, Finlandiya hakimiyyəti Rusiya vətəndaşlarına ölkədə daşınmaz əmlak almağı qadağan etməyi təklif edərkən “pozğun məntiqi” rəhbər tutur.

Nicat