Dünyanın böyük banklarının əksəriyyəti bu il Çinin iqtisadi artımı ilə bağlı proqnozlarına yenidən baxıb. Bank of America, Goldman Sachs Group, JPMorgan Chase və bir sıra digərləri Çin iqtisadiyyatının 4,8% artacağını gözləyirlər. Bank of America ekspertlərinin fikrincə, növbəti iki ildə artım 4,5%-ə qədər daha da yavaşlaya bilər. Əvvəlki proqnozlarda banklar bu il artımı 5%, növbəti iki il ərzində isə 4,7%-ə qədər yavaşlamağı təxmin edirdilər. 

Valyuta.az xəbər verir ki, bu barədə "Bloomberg" məlumat yayıb.

Bank ekspertləri hesab edir ki, ölkə iqtisadiyyatı Çin rəhbərliyinin qarşıya qoyduğu 5%-lik hədəfə çatmayacaq. "Bloomberg"in qeyd etdiyi kimi, artımın tədricən yavaşlaması fonunda Pekinə iqtisadi stimullaşdırmanı artırmağa çağırışlar artır. Bununla belə, indiyədək stimullaşdırıcı tədbirlərdə dəyişikliklər demək olar ki, hiss olunmur və Çinin mərkəzi bankı “radikal” addımlar atmayacağını bildirib.

Bank of America iqtisadçısı Helen Qiao izah edir: "Biz hesab edirik ki, həm fiskal, həm də pul siyasəti ilə bağlı mövqe indi lazım olduğundan daha az uyğundur və daxili tələb artımını bərpa etmək üçün kifayət deyil". 

Bank qeyd edir ki, ABŞ prezident seçkiləri Çinin iqtisadi artımı üçün əsas qeyri-müəyyənlik olaraq qalır və ixrac hazırda iqtisadiyyat üçün demək olar yeganə işıq şüası olaraq qalır.

Rəsmi məlumatlara görə, ilin ilk yeddi ayında hökumət xərcləri azalıb və aşağı faiz dərəcələrinə baxmayaraq, kreditlərə tələb zəif qalıb. Bank of America, qeyri-kafi hökumət dəstəyi səbəbindən Çinin iqtisadi artımının yaxın iki il ərzində potensialın altında sabitləşəcəyini təxmin edir.

Paşa Məmmədli