Liviyanın milli neft şirkəti NOC ölkədən neft hasilatı və ixrac dayandırıldığı üç gün ərzində 120,34 milyon dollardan çox itirib. 

Valyuta.az xəbər verir ki, korporasiyanın hesablamalarına görə, avqustun 26-dan 28-dək hasilat itkiləri 1,504 milyon barel nefti ötüb. 

NOC müvafiq məlumatları özünün "Facebook" səhifəsində dərc edib.

Qeyd edək ki, Liviyada ikili hakimiyyət hökm sürür. Ölkənin şərqinə Liviya Milli Ordusu, qərbinə Milli Birlik Hökuməti nəzarət edir. 

Avqustun 7-də NOC "Əş-Şərəra" yatağında neft hasilatının dayandırıldığını elan edib. Avqustun 26-da şərqdəki hökumət bütün yataqlarda fors-major vəziyyət elan edib. Bu səbəbdən neft hasilatı və ixracı dayandırılıb. Qərar Tripolidəki rəqib hökumətin mərkəzi bankın rəhbərliyini dəyişmək cəhdindən sonra verilib. 

Çoxmilyardlıq enerji gəlirlərini idarə edən mərkəzi bankın rəhbərliyi ilə bağlı qarşıdurma son həftə ərzində kəskinləşib. Bu, siyasi parçalanmaları dərinləşdirib və BMT-nin vasitəçiliyi ilə əldə edilmiş sülh sazişini təhlükə altına qoyub. Ölkənin qərbində beynəlxalq səviyyədə tanınan hökumət istefa verməkdən imtina edən qubernator Sadiq Əl-Kəbiri əvəz etməyə çalışırdı.

Məlumata görə, Liviyanın ümumi neft hasilatı ötən ay gündə təxminən 1,15 milyon barel olub. O vaxtdan bəri gündə demək olar ki, 270 min barel hasil edən ən böyük neft yatağı olan Şərara fəaliyyətini dayandırıb. Ölkənin şərqində Liviyanın neft ehtiyatlarının böyük hissəsi və ölkənin dörd neft ixrac terminalının cəmləşdiyi Sirt hövzəsi yerləşir.

Paşa Məmmədli