Hindistan və Rusiya milli valyutalarda qarşılıqlı hesablaşmaların tətbiqi və ikitərəfli ticarətin artması üçün qeyri-tarif maneələrinin aradan qaldırılmasını müzakirə edirlər. 

Valyuta.az xəbər verir ki, bu barədə TASS "İndian Business Standard"a istinadən xəbər verir.

Hindistanın ticarət nazirinin müavini Sunil Bartvalın sözlərinə görə, bu məsələlər Rusiyanın iqtisadi inkişaf naziri Maksim Reşetnikovla son görüşlərdə qaldırılıb.

"Biz rupi və rublda qarşılıqlı hesablaşmaların tətbiqi ilə ticarəti necə yaxşılaşdıracağımızı və qeyri-tarif maneələrinin necə azaldılmasını müzakirə etdik", deyə Bartval bildirib.

Danışıqlar ona görə vacibdir ki, Hindistan və Rusiya 2030-cu ilədək ticarət dövriyyəsini indiki 67 milyard dollardan 100 milyard dollara çatdırmaq niyyətindədirlər.

"Rusiya Hindistan əczaçılıq və digər məhsulların ixracına mane olan maneələri aradan qaldırmaq üçün işə başlayıb", deyə nazir müavini vurğulayıb.

Dehli Rusiyaya elektronika, dərman, dəniz məhsulları və digər qeyri-əmtəə mallarının tədarükünü əhəmiyyətli dərəcədə artıracağını gözləyir.

Paşa Məmmədli