Türkiyədə İnstaqramın bloklanması ilə bağlı müzakirələr davam edərkən, onlayn oyun platforması “Roblox”a da giriş qadağası qoyulub.

Yeniavaz.com xəbər verir ki, ölkənin İnformasiya Texnologiyaları və Rabitə Qurumunun (BTK) saytındakı məlumatda Böyük Britaniya mərkəzli www.roblox.com saytına girişin məhkəmə qərarı ilə bağlandığı bildirilib.

Ədliyyə naziri Yılmaz Tunç bildirib ki, azyaşlılara qarşı istismar xarakterli kontentlər təqdim etməsi səbəbilə “Roblox” oyun platforması və onun onlayn mağazalardakı keçidləri bloklanıb.

“Ölkəmizin, millətimizin gələcəyini düşünən, məsuliyyət daşıyan hər kəs övladlarımızı hədəf alan bu kimi hallara həssaslıqla yanaşmalı, populist, məsuliyyətsiz söhbətlərdən uzaq olmalıdır”, - nazir bildirib.

Qeyd edək ki, “Roblox” 2004-cü ildə qurulan “Roblox” Korporasiyasına məxsusdur. Platforma oyun oynamaqla yanaşı, istifadəçilərinə inkişaf etdirdikləri oyunları başqaları ilə paylaşma imkanı da təqdim edir.

“Roblox” hekayə yazmaq üçün hazırlanmış “Wattpad” və İnstaqramdan sonra son bir ayda Türkiyədə bloklanan üçüncü platforma olub.