Türkiyə turizm sənayesinin nümayəndələri bir daha əcnəbilər arasında populyar olan otellərdə “hər şey daxil” (“all inclusive”) formatına yenidən baxmağı təklif edirlər. 

Valyuta.az xəbər verir ki, bu barədə “Hürriyet” qəzeti məlumat yayıb.

Nəşr 1990-cı illərdə bu sistemin yaradıcılarından biri olan iş adamı Zəfər Alkayın fikrinə istinad edir. Qəzet qeyd edir ki, ötən illər ərzində Alkay onun dəyişdirilməsinin tərəfdarı olub.

“All inclusive” sistemi bizim turizm məkanımızın inkişafı üçün çox mühüm çıxış yolu oldu. Onun sayəsində əldə etdiyimiz nəticələr, şübhəsiz ki, danılmazdır. Ancaq illər sonra, indi yaşadığımız yeni prosesdə bunun yenidən müzakirə edilməsinə ehtiyac var. <…> Yüksək səviyyəli məhsul və xidmət tələb edən turistlər təbii ki, bunun əvəzini ödəməyə razıdırlar”, - deyə iş adamı bildirib.

Türkiyə turizm sənayesinin nümayəndələri əvvəllər dəfələrlə “hər şey daxil” formatına yenidən baxılması təklifləri ilə çıxış ediblər. Lakin onların əksəriyyəti, yerli turoperatorlar assosiasiyasının TASS-a verdiyi məlumata görə, özləri də etiraf edirlər ki, bu qurulan sistem davam edəcək.
“Bu illər ərzində müxtəlif fikirlər səsləndirilib, məsələn, “istifadə etdiyinizi ödəyin” modeli təklif edilib, lakin onlar xüsusilə xarici turistlər arasında populyar olan məşhur “hər şey daxil” sistemini əvəz etməyəcək”, - deyə assosiasiya bildirib.

Ötən il rəsmi məlumatlara görə, Türkiyəni 56,7 milyon turist ziyarət edib, birinci yeri Rusiya Federasiyasının vətəndaşları tutub - 6,3 milyon nəfər. Yerli hakimiyyət orqanları daha əvvəl bildirmişdilər ki, bu ilin sonuna qədər Türkiyə 60 milyon turist qəbul edərək, 60 milyard dollar turizm gəliri əldə etməyi planlaşdırır. 

Nicat