Rusiya və Suriya iqtisadi və ticarət əməkdaşlığının artırılması çərçivəsində ödənişlərin milli valyutalarda keçirilməsinə dair danışıqlar aparır. 

Valyuta.az xəbər verir ki, bu barədə “İzvestiya”ya Suriyanın Rusiyadakı səfirliyinin nümayəndəsi məlumat verib.

“Suriya və Rusiyanın mərkəzi banklarının nümayəndələri arasında bütün maliyyə və kommersiya əməliyyatlarında milli valyutaların (Suriya lirəsi və rus rublu – Gazeta.Ru) qəbulu məsələsi ilə bağlı davamlı görüşlər və məsləhətləşmələr aparılır”, - deyə məlumatda bildirilir.

Qəzet qeyd edir ki, Qərbin sanksiyalarına məruz qalan ölkələr dollarla ödənişlərdən yayınmağa və aktivlərini ABŞ və Aİ-dən çıxarmağa meyillidirlər. Bu dövlətlər milli valyutalarda ödənişlərə keçir və alternativ ödəniş sistemləri yaradır. Rusiya həm MDB, həm də Asiya ölkələri ilə münasibətlərdə belə sxemlərdən fəal istifadə edir.

Rusiya prezidenti Vladimir Putin qeyd edib ki, Avrasiya İqtisadi İttifaqı (Aİİ) çərçivəsində əməliyyatların 90%-dən çoxu milli valyutalarla həyata keçirilir. Məsələn, Rusiya ilə Çin arasında ödənişlərin təxminən 90%-i rubl və yuanla həyata keçirilir. Moskva da İranla tamamilə milli valyutada ödənişlərə keçib və bu prosesə Vyetnamla da başlayıb.

Nicat