Dünən, iyulun 16-da axşam saatlarında Manhetten Federal Məhkəməsi münsiflər heyəti tanınmış çinli iş adamı Quo Venguyu 1 milyard dollarlıq dələduzluqda təqsirli bilib. 

Valyuta.az xəbər verir ki, hökm noyabrın 19-da çıxarılacaq. Vəkillərin fikrincə, müddət bir neçə onilliklər ola bilər.

2000-ci illərin əvvəllərində Quo Venguy Pekinin ən yaxşı daşınmaz əmlak tərtibatçılarından biri və Çinin ən zəngin adamlarından biri idi. Onun şirkəti digər işlərlə yanaşı, 2008-ci il Olimpiadası üçün əjdaha şəklində Pangu Plaza yaşayış və kommersiya binaları kompleksini tikib. Lakin 2014-cü ildə o, ölkədən ABŞ-a qaçıb və oradan Çin hakimiyyətini fəal şəkildə tənqid etməyə və yüksək çinli məmurları korrupsiyada ittiham etməyə başlayıb.

ABŞ-da Quo Venguy bir çox mühafizəkar siyasətçilərlə, o cümlədən Donald Trampın keçmiş strateji müşaviri Stiven Bannonla əlaqələr qurub. Stiven Bannon özü də hazırda istintaq altındadır: 2022-ci ildə o, 2021-ci il yanvarın 6-da Kapitoliyə hücumla bağlı Konqresə ifadə verməkdən imtina etdiyi üçün 4 aylıq həbs cəzasına məhkum edilib. Apellyasiya şikayəti rədd edildikdən sonra Stiven Bannon iyulun əvvəlində federal həbsxanada dörd aylıq həbs cəzasını çəkməyə başlayıb.

Paşa Məmmədli